Moussieu l'Editeu,
“A tchèsque tu pense, ma Merrienne?” je d'mandit à la bouonnefemme hier au sé, quand, ayant liut la gâzette, ou réstit sans dithe un mot pour djais bouonnes minutes. “Y'a't'y tchiquechose tchi t'gène?”
“Nânin, Ph'lip,” ou raiponnit, “mais j's'y à pensé tchi s'arrive de bein drôles de choses dans nos pâraisses de campagne chais jours.”
J'l'y d'mandit pour une explicâtion.
“Et bein,” ou qu'menchit, “prends la pâraisse de Saint-Pièrre, yunne que j'ai tréjous admithé! L'Assembliée a décidé de hauchi l'rât de quatre sous.”
“Ch'n'est pas grandchose que quatre sous, et la pâraisse est riche.” je m'fit.
“Ch'n'est pas chonna,” ou dit. “Dans les bouons viers temps, quand un Connêtablye pâssait ses comptes, s'y pouvait montré une balanche en main, même de chinq louis, l'Assembliée 'tait tout-à-fait satisfaite, et y n'y'avait pas d'tchéston de hauchi l'rât, mais ch'n'est pas d'même au jour d'agniet. Le Connêtablye de Saint-Piêrre a des chents louis en main, le nombre d'quartchiers augmente touos l's ans, et pourtant le rât est hauchi. Ch'est une chose que je n'peux pas comprendre du-tout. Et-tu pûs savant qu'mé?”
“Pas un mio,” j'l'y dit, “mais par chein qu'j'en vais les Saint-Pierrais ont trop d'sous, et y n'savent pas tchi en faithe. Le temps pouorrait v'nin tch'y s'en r'pentithont.”
“Epis, a Saint Jean,” ou continuit, “ils ont laissi lûs pouore Recteur être en dangi d'sa vie pour je n'sais pas combain longtemps, et même ach'teu y n'éthaient fait rain s'y n's'était pas pliaint qu'une chimnee tchi 'tait drait en d'sûs d'san liet 'tait dans un si mauvais êtat qu'ou pouvait l'y tchais sûs l'haut d'la tête en autchun moment, Est-che la d'tchi faithe à un Recteur, j'te d'mande?”
“Ah bein, Merrienne,” j'l'y dit, “je n'crais pas que ch'est une chose de grande importance. Si l'homme en dangi d'sa vie avait tait un Connêtablye, un Chantgni, même autchun Principa d'Pâraisse, j'dithais bein, mais après tout un Recteur ne dév'thait pas avé d'peux d'être transporté au Paradis en autchun temps.”
La bouonnefemme dit que j'dév'thais avé grand honte de pas-la d'meme. “Dis chein qu'tu 'tais un Recteur, je n'crais pas qu'tu voudrais être transporte au Paradis par le moyen d'une brique à travers la tête. Quant a mé, j's'y contente de savé qu'la chimnee s'en va être r'dréchie au pûs tot possible. Comment qu'nou peut s'attendre qu'un Recteur peut prechi un bouon sérmon s'y n'est jamais seux d'un jour à l'autre que y'étha pas d'vant l'préchain Dimanche dans la Post une invitâtion signee par le Connêtablye ès membres d'la Municipalite, de s'trouvé au Rectorat pour prendre part es funérailles de lus Recteur? Pouorrais-tu l'faithe, té?”
“N'tant pas dans l'habitude d'prêchi des sérmons, bouons ou mauvais,” j'l'y dit, “je n'sais pas trop. Ach'teu, as-tu veu autchune autre chose dans la gâzette tchi t'a interrêssie?”
“Oui,” ou raiponnit, “j'ai veu que le Lieut'nant-Gouvérneux et sa dame, ont 'tait à la Trin'té pour vais des marmoûsets, et y m'semblye tch'il éthaient peut en vais tout-plien sans allé jusqu'la. Tchi veinnent à Saint-Ou, et j'lûs en montrethais mé.”
“Mais Merrienne,” j'l'y dit, “pas dans l'Portinfé. Y n'faut pas dithe ditét.”
“P't'être pas,” ou s'accordit, “mais la pâraisse est grande et j'n'ai pas yeu mes iers donnés pour rain. Avec chonna, j'ai tréjous r'mértchi qu'les marmoûsets ont prèsque tréjous d'belles femmes. J'pense bein qu'ch'est un plian d'la Providence pour réstauré la balanche. Nou vait chonna d'une autre manièthe. Un homme de siez pieds va mathié la pûs p'tite hardélle tch'y peut trouvé, et une grande haute fille ne s'sa pas contente s'ou n'peut pas trouvé un homme tch'y n'l'y veint pas à l'êpaule. Ach'teu, Ph'lip, nous est contents d'savé que l'prix des tomates amende.”
“Vèthe,” j'l'y dit, “comme le rât à Saint-Piérre il a hauchi, et y 'tait bétôt temps, mais même au prix d'agniet les tomates ne paient pas, et le sien tch'y pouôrra dithe à la fin d'la saison tch'il a fait des sous s'sa chanceux. Mais ch'n'est pas d'même avec les bêtes. D'mande à Percy l'Mâsuthi, ès Sieurs Le Ruez, Jack Rondé et à plusieurs d'autres tch'ont tréjous seu qu'une férme sans bêtes n'est pas une férme.”
“Tu crais que l'commérce amende?” ou d'mandit.
“J'l'éspèthe hardi,” j'l'y dit, “mais en tout temps l'homme tch'a gardé d'bouonnes bêtes n'a jamais 'tait en dangi d'faithe banq'route. Si j'avais yeu l'moyen, j'n'éthais pas yeu dans m'n'êtablye les brécoles tchi sont-là ach'teu. Enfin, ne v'là les shows tchi veinnent et p't'être qu'à Saint-Louothains ou à Saint-Martin j'pouorrai trouvé yun de tes couosins tch'y voudra bein m'vendre yunne ou deux bouonnes g'niches ou même des viaux d'un an.”
“Belle idée,” ou s'fit, “et ouèsque-tu trouv'thas les sous pour les péyi?”
“Entre couosins,” j'l'y dit, “nou dév'thait absolûment s'attendre à un mio d'crédit. Si j'fais une bouonne saison l'année tchi veint - ”
“Ah, va t'couochi,” ou s'fit. “J'ai yeu assez de tan gniolin.”
Ph'lip
1959
Viyiz étout: