Les Pages Jèrriaises

La Perseverance

La femme de Mes man fils, avet eunne pathe de gants,
Que s'nhomme avet yieut a tchique enterments,
Et comme les siens êtez un mio "shabby",
Ou pensi qu'ou l'aiprouvethai a les échangi.

Ne v'chin sa scène, racontaits par yi maime:
J'entre sies Diudy, bon soier, que j'lus dis;
Ne v'chin eunne pathe de gants que je voudrais changi;
La jeune fille me d'mandi t'chesque je voulais,
J'lis dis eunne "nice" pathe de gants si vos piais.

Comme où tet a choiesi mes gants, ne v'la ty pas,
Qu'un homme s'en vints et l'y dis en bas,
"We can't take them, there not from here,"
"Thank you" que j'dis " I'll go else where."

J'alli sies l'vaiêsin, j'entre tout grand,
Je lus d'mandi d'échangi mes gants;
Quand l'homme les ôti de dans l'papi,
Y châtchit sa tête et les r'patchit.

"They have not been bought here my good woman,"
"Why don't you try and go to Mess Laymon."
J'alli sies Laymon, mais jamais de ma vie,
Je n'avais tet si einsulteai et si mal servie.

Y me d'mendidre si j'les avez yieux là,
Je n'voulez pas menti, j'dis nannin dgia,
Y m'didre que j'tais bein affronteaie,
De v'nein les disturbé en pienne arleveaie.

En sortant, j'tais justement a douné "over",
Quand ne v'la que j'pense à Leon et Pouteur.
J'entre tout dret, sans complîments,
Et j'lus d'mandi d'échangi mes gants.

Y me d'mandidre tchi sorte que jé voulais;
Si tchet de "kid" ou bein de soïeïs;
Y m'en donnidre eunne pathe, chest comme eunne pé d'eu:
Vraîment j'sis bein aise de les avé acheteu.

Ou viyis bein qui n'faut jamais m'sépethé,
Y faut tréjous tâchi de persevethé;
Comme dit l'Angliais "never say die,"
"When there is a wing to a sparrow to fly".

Y sont gris, mais tchesque qui l'en aies,
Nou n'peut pas tréjous avé s'en choies,
Et pis quand eunne chose est donnaie,
Les anciens dîzais qu'ou ne r'garde pas au neais,

Je sis bein contente de mes gants;
J'espèthe qu'ime duthonts bein longtemps;
Je les graîsthé quand y sont ûzeais,
Et de même y me duthonts bein d'zannaies.

N'ou n'peut pas tréjous avé ditêts barthiens,
Eun pathe de gants couote deuex ou treis chelleins;
Chest'zla m'ont quôtet rein et j'sis bein ganteais.
Quand j'eim promène au Dimanche arleveaie.

LIVONIA.

 

Viyiz étout:

 

Les Pages Jèrriaises