Les Pages Jèrriaises

Lé Paon sus l'Côti

Lé c'mîn dé fé êlectrique clyique et craûle,
Quandi qu'les falaises sont à pataûgi
Dans eune bliue mé d'acyi. Et vente-i' dû!
Mais viy'ous ch'na? Y'a un paon sus l'côti.

I' brousse achteu sus la Mé Irlandaise.
Lé train nos châque, et mé j'sis bein châtchi
Dé vaie un ouaîsé d'même si ordgilleux
Avanchant coumme un rêve sus chu côti.

Ch't ouaîsé pathade tout seu sus la vèrduthe,
Împéthieux en pourpre et bliu, et fyi.
J'sis humbl'ye dans l'ouadginnée dé passagièrs,
Êmèrvilyi d'vaie un paon sus l'côti.

Lé cacheux sûffl'ye - et lé train grînche acouo.
Méta sus méta, et l'paon sus m'n esprit -
Ch'est la grînch'chie d'moments tchi sont sus l'pus:
Rares et rêvés, coumme lé paon sus l'côti.

Ch'est l'rîncliot d'eune rêalité qu'nou ouait;
Nou vait des înstants tchiyant coumme d'la plyie;
Des mithacl'yes arrivent coumme les trains d'aut'fais.
Mais créthêt'ous? Y'a un paon sus l'côti.

 

Geraint Jennings
Île dé Man
Juilet 2002

 

Viyiz étout:

 

Les Pages Jèrriaises