Y'a du monde tchi fûtent êmèrvilyis quand l'actrice Gwyneth Paltrow et s'n houmme, lé chanteux Chris Martin d'la dgaîngue Coldplay, donnit l'nom Apple à lus p'tit êfant. Mais y'a tant d'noms r'mèrquabl'yes par les c'mîns qu'nou n'dait pon êt' trop surprîns par des mousses auve des noms d'frits.
Ch'est en tchi les pathents Jèrriais pouôrraient bein bâptîsi eune fil'ye auve lé nom Pomme, sustout s'i' y'a un nom d'fanmil'ye conv'nabl'ye auve, coumme par exempl'ye, Pèrchard ou Pithouët. Et Pomme Podêtre éthait l'air pustôt distîndgi, n'est-che pon?
Et y'a des gardinnées d'aut's frits pouor înspither les péthes et méthes. Nou peut bein înmaginner un garçon app'lé Vèrjus... p't-êt' Vèrjus Vibèrt ou Vèrjus Vouaîsîn. M'lon es'sait solide coumme nom étout: j'allons-t-i' vaie un M'lon Mouothant ou un M'lon L'Mèrquand à l'av'nîn?
Preune ou Pêche sembl'yent assez belles pouor eune fil'ye, tout coumme Frambouaise. Et né v'là eune bouanne suggestchion pouor Les Feuvres – Frambouaise Lé Feuvre pathaît bein faichonnabl'ye, valet!
Mais jé n'sis pon convaintchu qu'Les Cornus éthaient atchilyi eune pétite Cocannette, ouaithe qué Cocannette Lé Cornu n'appathaîsse dgéthe piéthe qué Bèrnadette Lé Cornu ou Juliette Lé Cornu ou Colette Lé Cornu. À la pliaiche, j'éthais r'quémandé lé nom Kiwi: ch'est un nom tchi pouôrrait bein s'pliaithe ès cheins tch'ont d'la fanmil'ye là-bas en Nouvelle Zélande, et auprès tout, Kiwi Coutanche ou Kiwi Vaûtchi es'saient bein modèrnes.
J'allons-t-i' aver Limon Larbalêtchi ou Rhubarbe Rom'thi ou Banane Bliampid? Assa, ch'est entre les mains des pathents – quand la pomme est meûse, ou tchait!
Geraint Jennings
Viyiz étout: