Eh bin! Etes ous contents au mains, d'chu coup? que j'dis a Sam R'non, tchétait v'nu bethe du tée ov nous après la grande Reunion d'Sam'di, l'affaithe a t'alle touoné a votr' gout?
"Magnifique! qui rèspounni, en fouorant la maintchi d'eunne beurrée de g'lée dans sa bouoche; je l'vos avons rouolés a pliatte couotuthe! Les v'la tchuits pour longtemps."
Escrazés, p't'etre, je n'dit pas, Sam: mais pas tués! ou r'ouithez paslé d'ieux l'année tchi vint! Dis que j'te l'dit.
Sam. Tchi viv'ra verra! Mais m'dithas tu tchès qui les pous'linne, les soué-disant reformateurs? Tchès qu'y'a qui n'va pon bin? et tchès qu'is ont a rouablié contre le Coumiti d'Messieux qui prend si bouan soin d'nos affaithes sans qu'j'aions eunne mis d'embaras?
Mé. Mais ch'est justément ch'la - aide té d'un morcé d'gâche. Lonore, passe la gâche a Sam! - qui les fait anglyi, a ch'que j'en comprends! I' voudraient avé l'drouét d'chouêsi l'êstchipage de lus navithe; et disent qu'ch'est honteux que siez chents membres s'aient souos la tutelle d'un coupl'ye d'douzaines.
Sam. Mais pis que j'te dit - eunne tchul'lée d'chucre, si vos pliait Missis Pain - qu'chutte poignie d'Messieux qui paient un louis sont pouoris d'capacité, et qu'ch'est pon entou pour lus avantage a ieux mêmes qui travallent - ils y sont hort de pouchette!
Mé. Tu cré cheunna? J'ai pourtant qui dithe qui' s'ent' noumment juges, té anniet, mé la prechenne fais, qui' s'ent' mettent du Herd Book, qui n'y'a qu'yeux sus touos les Coumitée; et qu'lus bêtes sont tréjous pus souvent Highly qu'les siennes du peltas!
Sam. Douoch'ment, douoch'ment! N'y'a pas d'peltas dans la Société Royale; n'y'a qu'des buzards - deux d'gouts lait s'ou pliez, Miss Pain - Tout est bin, j'te dis, sinon qu'j'avons perdu l'miyeu Président qu'jommais d'ma vie n'aie veu! Ch'la, par exemplye, est la piéthe djob qui pouvait s'arrivé!
Mé. V'la tchi vos sert bin! Mais. Mais, dis-mé - mange don! tu n'mange pas! - Pourtchi qu'ou r'avez noumé un Recteu? J'pensais qu'ous 'taites 'fed up' la d'sus.
Sam. N'te gêne pas! Y'en a pus d'eunne sorte! Ch'tinchin est d'la bouonne, et sait compté!
Mé. All right! Mais mêfious! Les perdant d'anniét n'sont pon morts, i' i'en faut! I' s'en vont ruminé tout l'êsté; et' l'hivé tchi vint...dèscampe man vi!
Lonore. Tchi fonne! Si j'en 'tais, d'la Royale, l'année tchi vint, j'éthais un tas d'motos et d'bus, pour amné en ville les siens qui sont trop piercheurs pour de dèsrangi. Y'éthais du feu d'satchi!... et mé, j'aime tant la calheu.
Sam. Hé, mais, che'st eunne idée, chette la! Faudra qu'j'en pasle a nos gens. Nous éthait l'Meetinne dans l'Pavilon ou siex Marks. Pour un couplye d'Louis d'frais, par paraisse, nous en verrait la coue!
Mé. N'nos êslourde don pon Lonore! Et veur tu bin n'pas met' tant de glée sus ta beurrée! ou viyis, que j'dis a Sam, en m'dèstouonant d'san bord, j'allouons a Lonore de metr' d'la glée sus sa beurré d'beurre quand y'a d'la compognyie; et oul en douothe des deux bords). Mais, dis mé, Sam; tchès qui fait qu'ou n'avez pon dounné autchun post au conon? Ou counaissiz pour-[...]
Sam. Vethe! J'les counaissons! Mais il est temps que j'men aille siez nous; nos gens s'en vont créthe qué j'sis èsdjéthé.
Quand Sam fut hort, j'allumi ma pipe, et j'me mins a ruminé sus l's'affaithes de tchi j'avaimes paslé. Et eunne drole d'idée m'vint. Mettons, que j'me dit à mé même, mettons qu'pour eunne caude ou eunne autre, persounne ne souscrivthait un louis l'anné tchi vint! Pas "d'pound" members, don, pas d'juges, pas d'Coumités! L'Président en l'Secretaithe restéthaient touos seurs pour faithe a lus idée! Y'éthait là eunne drôle de situation, dites!
Piteur Pain
The Morning News 19/12/1913
Viyiz étout: