J'en 'tais a me d'mandé tch faithe de me même a-matin, quand ne v'la l'téléphone de l'office qui sufflye: "You there, Mister Pain? Come down here, will you,"
Bon, s'fit Lonôre. Tchès qu'il y r'at en allant acht'heu? Oquo tchiq djob hors pays, sans doute; et nos laissi, mémée et mé, toutes seules oquo eunne fais, parmi les danjiers et tentations de chutte ville de perdition
T'èsnerve pas, m'n'èsfant, que j'lis dit, en enfilant les bras d'ma casaque. Si ch'est oquo pour eunne autre djob hors pays, y'a un bathi d'patates souos le d'gré, des concombres dans l'armouaithe, et j'dithai a Samuel, en passant, d'avé l'yi sus vous et d'proumné tchiq fais Lonôre le sé sus les cauchis et offuche oué la musique sus l'Parc.
Hé bin! Ch'n'est pon pour sorti d'Jerri, chutte fais. Ch'est pour servi d'gidde a un moussieur Italien qu'est v'nu exprès ichin pour èstudié not gouvernment. D'pis qu'les Italiens ont quazi accapathé Tripoli, y n'savent pon trop sus tchi pi dansé, et l'Gouvernment, a ch'qui pathait, a cru que p't'ètre j'pouôraimes lus montré coumment s'prendre pour gouverné les Tripolis - quand ils ethont prins l'pays. La preunmiéthe idée avait 'té d'dounné au Moussieu de tchi j'pâsle, eunne lettre au Greffi, ou a tchiq' Deputé d'campanne, pour etr' rensigni sus la chose. Mais y fut a la fin décidé qu'la miyeu monièthe de tout savé, je s'ait de s'proumné de par l'Ile ov un bouon Jerriais, sans faithe mine de rin, et sans dithe a persounne tchès qu'yavait en allant.
Ch'est-tan-tchi, ch'est "l'Morning News" qu'a yeu la djob d'instruithe Moussieu l'Italien, et mé la seinne de lis faithe vaie tout ch'qui pouôrrait y'etre utile pour pus tard, et si y'a moyen d'trouvé tchiq plian pour s'dèspieautchi du pité dans tchi qui sont là bas dans l'pays ou-ès qui sont à s'battre. J'soummes pour qu'menchi d'main. Not' preumié visite s'a ès Tchen'vais, vais l'Camp, et prendre des renseignements sus la moniéthe Jerriais de drillyi des soudards; sus tchi qu'nou les nouôrri, tches qui bèvent, combin d'heuthes qui se r'posent par jour; et offuche si tchiqu'un d'yeux voudrait joindre l'Armée d'Italie après l'avout. Touos lus frais s'aient payis allé et v'nin, a ch'qui pathait, et eunne fais la dgèrre finie, les siens qui voudraient s'èstablyi en Tunisie, nou lus dounnait un bétchet d'terre et d'la graine dé m'lon - v'la tchi paie mus qu'des Royales dans lus terres sabliounneuses.
Moussieu l'Conte tchin etou a etre renseignyi sus not' Police Honorifique. Nou y'a dit d'prendre copie d'sus pour pus tard en monté yeunne en Tunisie sitot qu'les Italiens ethont fini d'èsmaglyi l'en'min. L'idée s'sait de d'mandé a yun d'nos Chantniers d'allé là bas touos frais payis et un baton d'justice ov un m'lon en argent sus l'coupé, pour lus montré coumment qu'nou s'y prend pour happé les voleux d'poummes - quand y'étha des poummes.
Et un tas d'autres renseign'ments qué j'sis chérgi d'lis fourni. Chose seuthe que j'm'en vais y passé ben des jours, et allé a bin des bords - touos frais payis, ben entendu, et l'usage d'un 'moto-car.' Ou nos verrez un mio partout, d'niet et d'jour, et j'compte sus vous pour nos aidji a fouorré not' nez partout.
J'sis pour avé eunne medalle quand tout s'a fini.
Piteur Pain
Morning News 1/8/1912
Viyiz étout: