|
Les roses rotchièrs portent eune bague dé baînis, Engagis auve lé melgreu et les mielles; Et les louêmes crêmeuses, pouor les habilyi, Ont fait eune robe dé mathiage en dentelle. Les dents d'l'Enfé ont êl'vé haut la pèrque Et, ouaithe qu'nou vait chu cliochi dé galots, Ch'est bein la veue dé Gatteville tchi nos mèrque Not' vouaie ès neuches saussées l'travèrs des clios. Les mâchouaithes du Malîn né mordéthont Qu'la gâche dé neuches au vrai et ès êcales; Et si not' chapelle à des bancs d'sablion, Ch'est qu'oulle a mille galots pouor ses muthâles. Et les vièrges sablionneuses, ont-i' dé l'hielle Assez pouor êcliaithi lé c'mîn d'l'Enfé? Oui-dgia! Èrmèrtchiz bein les cliaithes chandelles - Les louêmes dé crême tchi brûlent blianches coumme du fé. La veue l'a veue - eune râmass'sie d'mémouaithes; Eune bouochie dg'ieau d'la mé qu'nou n'avale pon. La dgêle êmoûque les p'tits galots tch'êcliaithent Lé rose du grannit et l'blianc du sablion. La pèrque, la veue, lé cliochi sont nos mèrs, Brîngis, blianchis et bênits par la dgêle. La dentelle des nouages fliotte dévant nos ièrs: Les neuches mathinnes dé l'Enfé et du ciel. Geraint Jennings Gatteville - Barflieu - St. Vaast la Hougue 12/8/2002 |
Viyiz étout: