|
File et file, men p'tit rouèt, Ma tâche est bétôt finie; Filant d'jeu, et ouvrant d'nièt, J'ai t-i saccagi ma vie! Pouore vieille, à nonante ans Je n'sis pon bein rêsolue; J'ai veu bein des sortes d'temps Devant v'nin au but d'ma rue. Je fu nèe le six d'Janvi, Même jeu et même annèe Que Rull'court* vint en Jéry: I fut r'chu à s'n-arrivèe, Car il ieut du feu saqui D'vant qu'l'affaithe fut finie; Ch'était là dans l'Vièr-marchi Que Pierson perdit sa vie. Ch'n'est pon que je m'en r'souveins, J'l'ai oui conter à men pèthe: Car il eut un divèrs train; Ch'tait quthieux dans ouir l'histouethe. J'en ai accouo un fusi Qui fut prins à la bataille. Et, ma fei, j'en ai d'l'orgui, Quoeque ach'teu ch'seit rein-qui-vaille. J'ai un p'tit miot d'ambition; Quthieuse èttouot de ma sorte, J'voulais vêir l'exhibition; Mais am forche est quasi horte. Enfin, dévrai, j'ai gagni Jusqu'à l'us de chu collège Qui pathait coume un magni: Me doun'nous, s'ouos-pllait, un siège? Quaithe, ou fauteuil, ou sofa; Vèille, ou fieillie, ou scabelle, Auqu'un de chês-là me f'tha; Quand che s'thait sus d'la madelle, Pourveu qu'j'eusse un sectin d'sus, Je me trouv'thais bein assise, Bein-niadret, et jamais mus Que si j'tais sus de la plise. File et file, men p'tit rouèt, File et file coum' la vie; Faisons tous not' d'vé anièt; Quand la journèe s'tha finie, Demain, i faut l'espéther, Tasnès en paix souos la bieste, Chein qu'j'avons à enduther, S'tha changi en jours de fête. |
* Le grand baloque de m'n-anmin Flippe.
Viyiz étout: