Hélâ! ch'est d'tchi bein triste
Pour les siens qui vont souvent en visite;
Afin de d'visé sus l'z-uns et sus l'aôutres,
En y trouvant, bein saeux, hardi d'faoutes.
Parêtudié lé pedigree des gens
En disant: Ou-est qu'est l'temps
Que l'bouan houmme et la bouanne femme,
Quand ils taient touos les daeux jeannes -
Dans chu temps là i' n'y-avait pas d'fille -
Au c'menchement qu'ils allaient en ville
Avec lus hernais et lus vieille jument,
Qu'avait un bouan gouvernement,
A porté l'beurre par les maisons
Tandi que la vieille fille disait: Tch'est qui sont;
En triant de bouannes vieilles vacques
Qui taient p't-être du pedigree stock!

Pâlèe mé du bouan vièr temps
Qui n'est pas du goût ès jeannes gens
I' pathaît qui y-a des jeannes filles
Qui sont extrêmement difficile,
Parce qu'ils veulent de tchi chouaisi
En n'voulant pas mathié un fermi,
Principalement dans la Trintai,
Quand un fermi à trait, i' sent à lait.

Nou k'menche à s'motchi du fermi,
Qui fait chein qui peut pour payi
Sa ferme après avé bein travâyi
En pensant pas du tout à l'orgi.
N'vos motchins pas des siens qui font d'lus mus,
Car i' y-a du drap pour que tous s'est vêtus.

Si ou voulèz savé des nouvelles
Allèz sièz les vieilles hardelles.
J'crai que ch'est là les pièthe
Pour des nouvelles à en faithe.
Souvent i' n'disent pas la véthitèt;
Coumme tout s'est passé,
Né v'là tchi qu'arrive
Pour les siens qui vont vais les jeunes filles:
J'l'ai veu à s'proum'né avec li,
Un grand garçon qui tai bein changi
Et pis i' y-a fait un p'tit kiss
En disant good-night à sa Miss.
Quand nou z-a de tchi jeanne,
V'là qui fait plaisià la bouanne femme,
Tandi que les vieilles filles sont jalouses,
Pensant qui n'y-a pas de garçons pour tous.

L'est v'là toutes k'menchies à d'visé,
Sus chein que l'monde aime à êcouté,
En disant de belle petites menties,
Qui font du trouble et du d'vis,
Et pis après tout chein qu'est ajouoté,
En v'là trop pour être la véthitèt.
D'pis que quand nou va les vais,
Quand i' sont tout à fait en paix,
Tch'est qui ta dit chonchein et chouna,
I' disent: D'mande au p'tit cat,
J'men vais pas te le dithe,
Je l'ai ouï par unne vieille fille.
D'maime i' faout ben s'contenté
D'entendre chein qui n'est pas la véthitèt.

Pour de mé, Caouain, j'crai bein
Quand maime que j'ithais jusqu'à St. Ouain;
J'peux pas empechi l'monde de d'visé,
Ches coumme si j'empêchais la mé de monté.
N'étant pas en peine de chein que l'monde disent de mé,
Parce que j'n'sis pas en tout court de pé.
Quand i' s'ront tous ennièes de d'visé
I' pouorront tout à fait bein lus gratté.

Quand i' s'agit de tracé le pedigree
D'un caouain et de ses p'tits,
J'sis bein aise d'en môtré d'ma race
Qui n's'ra pas longtemps d'vant de joué des farces,
Car cavous bein que j'ai un p'tit
Qu'est justement hors du nid.
J'vos garantis qui m'a mins en jouaie
De l'entendre avec sa p'tite vouaie
Me dithe: Tu sai' bein Julie,
Ou l'est unne drôle de pie!
Eh bein! J'pensi ne v'là de tchi bé
Pour un p'tit ouaisé coumme té.

Quand mes p'tits ithont lus proum'né,
Vos poulettes se mettront à chanté
Et si ou lus môtrès d'la galette,
I' n's'ront pas longtemps à faithe la poudrette.
J'vos promet que je n'frai pon d'embarras,
D'pis que je ne s'rai pas responsable de lus travas!

Mes chièrs anmins, quand nou est jeune
I' faout pas avé paeux d'apprendre,
Si nou z-est à vos môtré la lumièthe,
I' faout bein êcouté et se taithe.
Ou mettrèz les viers de bouanne humeur
Si ou avèz idèe d'avé la p'tite flieur,
D'pis que quand nou pense à de tchi qu'nou veur,
V'là qui fait du bein au p'tit coeur.

J'vos dit, méfious, bouannes gens,
Pour les filles qu'ont trente à chinquante ans,
Ils éprouvent à vos hallé des dents
Sans pinchettes, dans bein p'tit d'temps.
Si ou voulèz lus pièthe
I' faout lus dithe bein des nouvelles,
Si ou pouvèz, sus votre vaisin,
Chein qui peut l'i faithe bein du chagrin.

Le temps d'acheteu n'est pas l'temps pâssé,
Et i' dev'thait y-avé bein pus de fraternité.
Le monde d'achteu sont coumme le vent,
I' n'ont pas du tout de discernement,
En d'visant contre unne personne quand ou vi,
Et pis quand il est mort i' y-a pas ditèt coumme li.
A vous, d'aoutres sont à vos admithé
Dans l'temps qu'ou z-êtes à lus pâlé:
Dès qu'ou z-avèz l'dos touanné:
Il' ont toupé d'vos dèchithé.
Il a fait chounechin, il a fait chouna.
Ne v'la chein qu'est la cause de tout l'ma.

Quand nou va à l'Egise ou à la Chapelle,
Après qu'nou z-a entendu les prières.
Faout faithe bein attention au sermon,
Pour l'amour que j'en profitons,
A la pièche d'être à faithe des r'merques
Sus l'monde qui sont assis à lus pièche,
Et dithe: Ne v'là unne fille qu'a un biau chapé,
I' faout que j'en acate iun pû bé,
Car v'là le temps du nouvé
Pour les jeunes gens de se r'mettre à l'été.

I' y-a un p'tit temps j'ouï un sermon
De tchi que j'prins hardi d'attention.
Le sujet tait l'maime que j'vint d'êcrithe,
Qui peut faithe pour garçon et fille.
J'vos garantis que j'ai bein pensé
A tout cha qui s'est pâssé;
V'là qui m'a fait un bein considérable,
Coumme à tout l'monde en général,
Car nou z-est tous l'z-uns coumme les aoutres;
Nou a tous chacun ses faoutes.

Cha qui nos faoudrait dans notre p'tit pays,
S'rait un bouan docteu pour djéthi
Les siens qu'ont tchique mauvaise maladie,
Qui s'mette à cacté coumme des pies,
Et pour les siens qui s'raient les pièthent
I' lus faoudrait unne tassèe d'comièthe.

Si j'ai un avis à vos douné;
Ch'est d'allé pas trop vaisiné,
Et de resté châtchun sièz sé
Pour faithe des san mus à s'otchupé:
En ayant un bouan esprit à travâyi
Dans notre belle p'tite île de Jerri,
Sachant bein tch'est qui faout faithe
Pour faithe honneu à ses affaithes,
Et èttou de payi y-ou qu'nou pâsse,
Ch'est là la miyeur clâsse
De gens qui sont bein contents;
A vivre honnêtement tout l'temps.

J'espèthe que les strikes s'en vont lus arrangi
Pour les fermiers qui s'en vont s'mettre à foui
La récolte des pommes-de-terre,
Que nou z-exporte pour l'Angliéterre.
Il est à d'siré que le fermi,
Après avé bein travâyi
A grapiné, griffonné et houetté,
D'pis l'matin jusqu'au sé;
I' faout espéré qu'il étha sa récompense,
Car j'vos promet qu'il a hardi de dépense.

A la saison qui s'en va arrivé,
N'sachant pas coument tout s'en va allé,
J'vos souhaite à tous unne bouanne saison,
Car il est temps d'avé unne bouanne addition.

Ou z-allèz p't-être bein vos mettre à rithe
De tout chein que j'veins d'êcrithe.
J'aime bein vos êcrithe le vièr patouais,
Coumme les vièrs Jerriais d'aoutrefais.
Espéthant que ce s'ra unne bouanne leçon
A bein du monde qu'en profit'thont.
Il est temps de terminé man chapitre,
Pour vous à l'lièthe sus la vieille Chronique.