Ch'tait annièt, Jeudi, que Messieux l's'Aigrefins,
Messieux les Avocats, Ecrivains et Notaithes,
Avec touos lus commis tchittaient lus parchemins,
Lus précédents et lus brouoillons d'affaithes,
Pour s'en aller bein liain du Vièr Marchi,
Du R'gistre, des Contrats et d'la Cohue Royale,
Hors de la ville, enfin, en liberté marchi
Dans la campagne, si belle que rein n'l'êgale.

I' s'étaient entendus, ches gens qui chicanent tant,
Pour dithe que lus travas si long et difficile
Les mettait, à la fin, faillis coumme des êfants
Et les prédisposait à des attaques de bile
Pensez-don', mes amins, à lus heuthes de labeu':
De djix l'matin, jusqu'à chinq la r'lévèe!
Avec une heuthe pour lus p'tit r'pas d'mié-jeu:
Un verre d'ieau fraidde et deux ou trais beurrèes!

Ils avaient veu (avec pas mal d'envie, nou m'dit)
Que les villais, derniéth'ment, frument boutique
Quand vint l'heuthe de dîner, touos les bénis Jeudis
Sans s'gêner pus des besoins d'lus pratiques!
Nos Ecrivains ont creu qu'ch'la s'sait ètou d'lus goût,
Et, n'ayant pon, pour le moment, d'affaithes,
Ils ont pensè qu'ils en profit'tont tous, -
Pourvu q'personne ne halle trop d'par driéthe!

Mais y'en a yeu des vièrs du temps d'Godfray,
D'Westaway et d'Vickery, ches Avocats habiles,
Qui, pour longtemps, ont dit: J'n'y vai pas cliai,
J'veurs faithe des comptes, et prépather des billes,
R'chever des rentes, copier des testaments,
Envier des cartes à difféthentes tutelles,
Expédier des locataithes r'calcitrants,
Et rester prêt pour vaie la clientèle...

Y'a yeu, j'aprends, une sorte d'compromins:
Je n'sai' pas trop tchi mais j'm'en doute. -
Et à un heure, Messieurs les Aigrefins,
Lus jour fini, le Jeudi, s'mettent en route!

Pouorres corps, hélas! V'la qui n'promet pon bein,
Annièt, lus prumié jour, i'tchait d'la pl'yie à verse;
Chatchun siez sai, souos les pi'ds, bouans à rein
Avec lus femme, i' font d'la Controverse!

Elie