Les lîngnes tchi siêthent sont des notes données par Moussieu R. Anthoine Pépîn (Pépin), défunt, au Rédacteu y'a eune quarantaine d'années. Lé Sieur Pépîn, tréjous hardi êprîns entouor l'histouaithe dé Jèrri, vièr garçon et dêjà avanchi sus l'âge dans chu temps-là, fèrmait au Pontèrrîn (Lé Ponterrin) à St. Saûveux auve san fréthe et trais soeurs, vièr garçon étout et vielles fil'yes. Et, comme i' soulait dithe, lus fréthe lé Révérend Jean Pépîn, Minnistre à St. Ou pouor bein d's années, était l'seul tch'avait sorti du nid. Mais, d'originne, la fanmil'ye était sortie d'Grouville.
F. Le Maistre
La chapelle d'Êden fut bâtie sus un betchet d'tèrrain donné par lé Sieur J. Anmîn (Amy), des Arches, tout près. La chapelle fut ouvèrte en 1838. La maîson où'est qu' Mess Vivian reste a nom 'Eden House' à cause qué ch'tait là qué l'Minnistre wesleyen d'meuthait. En allant ouêst nou veint ès Grands C'mins (Les Grands Chemins), eune propriêté ayant chu nom-là étout. Dans l'Appariement des Prévostés (1669) nou trouve la mention du 'Parquet des Grands Chemins' comme étant partie d'la fèrme à Jean L'Maistre - la fèrme apparténant à ch't heu à Missis Èrnon. Un mio pus liain nou crouaîse la grand'route (tchi mène pouor St. Martin) et nouos v'là dans du tèrrain apparténant d'pis longtemps à la fanmil'ye Falle dé Maufant. Lé Juge Vaudîn soulait m'dithe qué l'clios à la drouaite fut bailli pouor l'amour dé pouver env'yer un janne Falle au Collège Victoria, et pis qué l'clios à la gauche fut bailli pouor l'env'yer à l'Unnivèrsité. I' d'vînt Minnistre (Recteu) à St. Brélade, et fut l'péthe du défunt Douoyen Samuel Falle.
Allant acouo ouêst, nou veint à un p'tit amont. À mé-c'mîn eune cache tch'est d'à pic condit à eune maîson apparténant à Missis Èrnon (Renouf). A la drouaite dé chutte cache est un c'mîn atout des pièrres dé châque côté tchi s'appelle Lé C'mîn d's Êcolièrs (Le Chemin des Écoliers), tch'était eune raccourche pouor les êcolièrs dé St. Mann'lyi (St. Mannelier). Dans l'êté i' fait bé à s'promener ava chu c'mîn, à travèrs un pré et pis amont un aut' quémîn, d'à pic, sus un pendant qué nou nomme Lé Piton. L'êcole dé St. Mann'lyi fut aut'fais lé collège dé l'Êst d'l'Île tchi m'nait pus tard les êcolièrs ès unnivèrsités. S'n empliaichement fut donné par un Minnistre d'St. Saûveux tch'avait nom Hue. À la fîn du 18ième siècl'ye un maître français à St. Mann'lyi fit tout un êbrouha dans l'Île, comme nou peut vaie par trais annonces dans eune gâzette du temps. La preunmiéthe annonce disait qu' non s'n allait emplyi un ballon d'air dans un pré tchi s'trouvait où'est tch'est à ch't heu La Route dé St. Mar (St. Mark's Road), et des billets fûdrent faits pouor les cheins tchi voulaient vaie ch'la. La s'maine en r'vénant (car n'y'avait qu' deux gâzettes la s'maine) lé maître annonçait tch'i' r'grettait qué l'affaithe n'eûsse pon rêussi, et qu' les gens pouvaient r'aver lus sou, mais tch'i' s'n allait r'êprouver dans deux'- trais jours. La préchaine gâzette înformait l'publyi qué l'affaithe avait rêussi. Lé ballon s'était envolé, ès appliaudissements des spectateurs, et avait enfin tchée en Nouormandie.
La maîson pus bas qu' St. Mann'lyi, 'Mon Plaisir', apparténait dans chu temps-là à Mess Ph'lippe Vivian. Jean Wesley y fut en visite, car lé Sieur Vivian était iun d'ses prédicateurs.
En rvénant à la maîson à Missis Èrnon, sus l'capé en d'ssus d' l'us nou liet l's innitiales IM et la date 1662. Chutte maîson fut bâtie par un Le Maistre, et il est tout probabl'ye qué Thomas L'Maistre, tchi fut l'auteur des fanmeux 'Manuscrits Le Maistre', fut né là en 1714. I' fut Vîngt'nyi à St, Saûveux, et i' mathyit eune Jeanne Falle.
En d'ssous d'la maîson à Missis Èrnon, avaû l'mont, y'a deux caûminnes. La cheinne à gauche, appelée La Solitude, apparténait contre la fîn du 19ième siècl'ye à Mess Josué Gâlyie (Gallie), et la cheinne à gauche apparténait à Mdlle. Mouothant (Mourant). Mess GâIyie la mathyit et s'en fut d'meuther dans la caûminne à sa femme et i' l'app'lîdrent 'Eden Cottage'. Ch'tait d'bouonnes gens, qu'ieux, et quand j'tais janne j'allais souvent auve Mess Gâlyie en Ville quand i' cachait lé j'va et l'hèrnais à man p'pèe.
Dans eune aut' maîson tout près, où'est qu' y'a un cadran, un traité sans couvèrtuthe fut trouvé et au bas d'eune page 'tait êcrit 'Élie Starck. Impressed May 15, 1802. On board H.M.S. Porcupine August 14. Deserted Oct. 12. Captured the same day'.
Au bas d'chu même mont j'arrivons à La Fôsse à l'Êcrivain (La Fosse à l'Écrivain), lé nom ayant té donné, i' pathaît, d'après eune fanmil'ye du vaîsinné au 17ième siècl'ye. En ramontant d'l'aut' bord, i' y'avait eune vielle maison sus l'pliat tèrrain; ou fut abattue en 1922. Dans chutte maîson vivait un Thomas Ahyi (Ahier) à la fîn du 18ième siècl'ye. Il 'tait homme d'affaithes et, ayant 'té tellement d'sappointé dé n'être pon nommé Lieut'nant-Bailli d'l'Île, la tête lî dêrangit. Comme i' n'y'avait pon d'Asile dans chu temps-là, i' l'enchaînaient à eune melle dans un appartènement à bas. Un gardgien en souongnait, pouor un temps un cèrtain tch'avait nom Le Lièvre. Lé pouôrre dêrangi avait des moments quand il 'tait assez sain d'esprit, et san gardgien lé laîssait à banon. Quand i' faîsait la minne dé s'êcapper et qué l'gardgien couothait souotre, i' lî criait: 'Là, né y là l'lièvre tchi couort auprès l'tchian!'. Souvent étout, quand nou lî donnait eune beurrée dé gelée, d'la rouoge, i' fliantchait ch'la contre la pathai et s'êcatchait: 'R'gardez mes soudards!', et c'menchait à donner d's ordres. Dans ches temps-là les soudards portaient la rouoge câsaque ou teunique, et lé Sieur Ahyi avait 'té Coronel dans l'régînment d'l'Êst dans la Milice.
À la gauche dé la rue tchi mène au Pontèrrîn y'a un clios d'quat' vrégies appelé Le Gardîn d'Hubèrt (Le Jardin de Hubert). Eh bein dans l'livre couvèrt en parchémîn qué j'ai mentionné d'vant, l'Appariement (1669-1671), tchi contcheint eune liste des Chef-ténants du Fieu du Rouai dans la pâraisse dé St. Saûveux, pathaît l'nom d'Estienne Hubert comme traîsième Chef-ténant. Et chu livre fut êcrit par Thomas Ahyi, tchi pouôrrait bein être l'êcrivain pus tard dêrangi d'esprit. Ch't Appariement, entre autre înformâtion, donne lé nom dé chaque Chef-ténant, châque nom d'clios, sa grandeu et ses jointuthes, et étout lé montant deu au Rouai. En êffet, ch'est un vrai 'cadastre' ou p'tit 'Domesday Book'.
Chent vèrgues pus liain est l'ensembl'ye d'maîsons tch'est L'Pontèrrîn. En fache est eune maîson atout deux arches, la grande dans les douze pids par huit, la p'tite (pouor les piêtons) siex pids par quatre. Y'a un êtchusson au haut d'la p'tite arche atout l's innitiales PF (Philippe Falle) et la date 1643. Chutte pétite arche a 'té faite en f'nêtre et l'bas èrbâti. Dé châque côté dé ches arches y'a eune maîson. Et ch'est tout d'tchi historique, atout vielles pièrres, des arches et d's us, vièrs pits, et cétéra. Y'a L'Gardîn d'l'Abbé, et L'Pré d'Falle tch'était un vivyi aut'fais. Chutte propriêté est sus l'Fieu du Rouai. Au nord du Pontêrrîn, dans la pâraisse dé La Trinneté, y'a un 'Fief du Ponterrin', et un Moulîn du Pontèrrîn. La chose est qué la méthe à Ph'lippe Falle 'tait Isabelle Payn, Danme du Fieu du Pontèrrîn à La Trinneté. Li, comme ch'la, i' d'vînt Seigneu du Pontèrrîn. Et né v'là pouortchi qué chu vaîsinné à St. Saûveux fut nommé étout Lé Pontèrrîn. Ph'lippe Falle mathyit Susanne Pipon, et lus fil'ye mathyit un Dumathés (Dumaresq) dé Bagot. Lus p'tit fis Richard s'en vînt d'meuther tout près l'grandpéthe et fit bâti eune maison d'l'aut' coté d'la rue et sus ieune des hautes cheunm'nées mînt un cadran atout ses innitiales RDM et la date 1736. Ieune des fil'yes dé Richard, nommée Françoise, mathyit Thomas L'Hardy, Connêtabl'ye d'St. Saûveux et Coronel dans la Milice. Dans la muthâle du pré en d'ssous d'la maîson y'a eune pièrre atout l's innitiales LHDY et la date 1792. Eune propriêté au bas d'la Rocque Mollet (Lé Mont d'St. Saûveux) d'vait li'apparténîn car y'a eune longue pièrre dans la muthâle atout les mêmes innitiales et FDM pouor sa femme, et la date 1793.
Ch'est dans la maîson d'l'aut' côté d'la rue qué l'traité mentionné d'vant fut trouvé, dans eune mansarde. I' soulait y'aver tout près étout un coupl'ye d'caûminnes couvèrtes en glyi, et pis y'a eune aut' maîson pas bein liain dé 'Livonia Lodge' où'est qu' lé Révérend Ph'lippe Falle fut né en 1656, lé chein tchi fut l'fondateu dé 'La Bibliothèque Publique' à St. Hélyi, et tch'êcrivit un livre entouor l'histouaithe dé Jèrri. Un portrait dé chutte vielle maison est mouontré dans l'29ième 'Bulletin de La Société Jersiaise'. S'n anmîn Jean Podêtre (Poingdestre) s'était mîns à êcrithe un livre sus Jèrri, mais quand i' sut qué l'Révérend Falle y'était étout i' li donnit san mannuscrit. Lé Sieur Podêtre démeuthait au Vièr Mênage (Le Vieux Ménage), dans la Vîngtaine dé Maufant, et pus tard d'vînt Lieut'nant-Bailli. Dans l'vaîsinné du Pontèrrîn est eune maîson tch'est nommée 'Le Ponterrin', et eune autre étout, bâtie à neu y'a tchiques années, 'La Maison du Ponterrin'.
Viyiz étout: