Y'a tchique temps, un anmîn Dgèrnésiais m'e-mailit – en Dgèrnésiais, comme dé raison – à seule fîn d'mé d'mander comme tchi qu'nou dit loganberry en Jerriais. Et j'pensis qué j'connais bein les frâses, et les frambouaises, et les mouaithes – mais jé n'connais pon les loganberries, ni comme tchi app'ler chu frit-là en Jèrriais.
Ch'est en tchi les loganberries veinnent d'eune crouaîs'sie d'mouaithes et d'frambouaises, et la variêté fut dêv'loppée en 1880 par un cèrtain Juge Logan tchi d'meuthait à Santa Cruz en Califournie.
Les ronches tchi craîssent par les c'mîns donnent lus frits au S'tembre quand les gens aiment aller les tchilyi. J'm'èrsouveins d'ma grand'méthe tchi soulait nos m'ner, ses p'tits êfants, aller tchilyi un tas d'mouaithes pouor en faithe des pâtés juseurs.
Et pis les flieurs dé seu font eune manniéthe dé champangne, et pus tard les chérises dé seu peuvent êt' faites sèrvi dans eune gelée tch'est bouonne, à chein qu'nou dit, pouor la toux.
Les châtaines dans lus coffîns nos font penser à l'Hivé tchi veint et les châtaines rôties, mais j'éthais dit, mé, qu'les mousses né tchil'yent pon les châtaines à j'va comme y'a tchiques ans. Ch'est-i' qu'les téléphones dé pouchette et la textéthie ont rempliaichi les gammes dé casse-mârron? Ou ché s'sait-i' pustôt eune tchestchion d'santé et d'seûth'té?
I' sembl'ye qu'en généra les gens n'vont pus tchilyi les frits l'long du fôssé comme i' soulaient l'faithe aut'fais. Au jour d'aniet y'a des frâses et tout pliein d'frits exotiques dans les supèrmarchièrs toute l'année – mais j'n'avons pon d'mots Jèrriais pouor les kiwis et les papayas, ni pouor les mouaithes à Mess Logan nitout.
Viyiz étout: