Vé t'en, Pierrot, quitt' ten travas,
I c'menche à qués des brins de pllie,
Et pour l'souper v'la Jane qui crie;
Si tu'es trop tard tu t'en pass'ras.

J'en avons fait un' buonn' journée,
Car je y-étions de buon matin:
A ch'teu qué la nié c'menche à v'nin,
J'aim' men souper et ma pipée.

Quand nou n'peut sorti' pour la pllie,
Aupr'ès de l'âtre et d'un buon feu,
J'aime à fumer ma pip' tout seu,
Ou ben fliâner en compagnie.

Mais pt'être que ch'n'est qu'une achie,
Le vent semble s'êtr' ramonté,
Et pis, au pièze, j'té dizai,
J'prendrous chacun not' parapllie.

Après soupé j'izons, s'tu veurs,
Siez not' vaisin, ves les hardelles;
Yen à tout plien et yen à d'belles.
Qu'ont les joues ruoges comm' des flieurs.

Ya Lizabeth, qui marche drèt,
Nou la prendrait pour un' buonn' vôle,
Et ya sa soeur, lli qu'est si drôle,
Et pis Susann' de Carteret.

Et pis Rachel. - (écoutt' chenchin,
Mais soigne ben de n'pas le r'dize) -
Ou m'a promis jusqué d'mécrize
Quand j'sortizai l'été préchain.

Qu'est qui sait si, quand je r'vendrai
Dans quiq' buonn' bordée de la côte,
Ove de l'or tout pllein ma pôte,
Je ne pouorrais la mazié.

Car j'té dizai, sans m'en vanté -
(J'ai découvert que les vanteurs
Le pus et l'mus sont des menteurs) -
Ya d'piez' garçons en Jerri qu'mé.

Mais i n'faut pas aller trop vite;
Qui va trop vite ben souvent
Rencontre pus d'un accident.
Quand un pus prudent en s'rait quitte.

Ses yiers sont niers comm' des prunelles,
Et ses g'veux sont pus niers que l'geais,
Le teint de ses joues est si frais,
Oull' est la reine des hardelles.

Si tu la viyais quand j'lie pâle,
Ou baiss' les yiers et pis ruogis
(Tu peux penser qu' j'y prends avis),
Et pis un' longue haleine ou hâle.

I faut attendre, et p'têtre un jour,
Quand je m'sezai prouvé un homme,
Et qu' j'ézai gagni quiq' buonn' somme,
Rachel accepteza m'n amour.