Ch'ést un plaisi couomme normal pour mé Clifford Laisney de vos présenté la lettre jerrsiaise aniet le dernier samedi d'l'année 2007.
Ch'ést p'têtre cause de faillitude de memouaithe, mais i me m's'memblye que quand j'tais mousse, un coup que Noué avait passé et q'nou fachait l'année suivante, ch'tait une étérnité d'attendre jusqu'au prechain Noué. L'excitement des célebrations 'tait passé, y'avait les longs jours d'hiver a fâchi, l'école et l's'examins, et i r's'embliait que la fin d'l'année 'tait des milles au liain. A m's'ûthes que j'ai veillyi et achteu avait joint le clobe octante tout ch'la a changi. Les jours de naissance onts appathence d'arrivé pus redgulyi quel temps passé, et aûssitot qu'une fête ou saison s'passe nous est a faithe des plians pour la prechaine. Probabliement, la vitesse des temps et l'commerce moderne contribusses au pas d'la vie.
L'année 2007 a 'tait une année d'haut et d'bas. Quouaiqu' l'hiver au c'mmenchement et a la fin a 'tait assez sombre, des parties d'l'Anglieterre couomme ou vos r'souv'nins, onts souffert cause des innondations d'ieau, les feus en Amerique et les trembliements d'terre onts causé grand detresse. Les dgerres en Iraq et Afghanistan continnuses sans cesse, causant grand minsethe es habitants et membres des armées. Plusieurs parties du monde ont souffert grand minsethe cause de bombes explosif pliantées par des malfaiteurs. Certaines parties du monde continnuesses a souffri d'mal nourrituthe a cause de fanminne et manque des nécéssitées d'la vie.
Les pays du monde sonts prépathées a brulé des millions en construithons d's'objets d'experimentation mais i lons l'air de depassé les nécéssaithes pour le bénefice des peuplyes au besoin.
J'avons veu des changements dans l'ile duthant cououthant d'l'année. Les batiments continusses a s'appathaites sus la partie d'la recliamation, de nouvelles hotels s'appâthe, la pliaiche de la Liberation est a subithe un nouvieau image et le centre de transport appathaits impeccablye dans sa grandeu. Duthant couôuthant d'l'année j'avons observé plusieurs instances de comédie dans la chambre des Etats. P'tetre que l'année tchi vint j'authons un vrai recit de pantomine politique.
Dûthant l' couothant d'l'année, mercie a bein des braves gens, jeunes et pus anciens, des sommes immences onts 'tait atchum'lés au bénefice de charités locale. Sans ch't'aide, bein des charités et societés authaits diffitchul'té a survivre, et j'pouvons etre erconnaissons a tous tchi contribusses a lus existence. Je sommes erconnaisons étout a tuous les gens tchi entreprendes la tâche d'aidgi es gens d'besoin d'ors pays. J'pense es siens tchi prends part dans les projets. Dûthant l'année hardi d'gens onts viagi en pays d'besoin en orde d'aidgi a bâti d's'hôpitas, écoles et foncer des pits en orde de fourni d'ieau eyou nécessaithe.
Arrivont a Noué, grâce a la génerosité d'un bénefacteu, Le Sieur David Kirch, les citouoyens senièurs de Jerri onts r'chû pour la deuxieme année suivante, une somme d'argent en forme de talons en orde tchi pououthaits rejoui de tchique petits lûxes d'extra dûthant les fêtes festives. Moussieu Kirch, j'vos r'mercions pour vôt génerosité, ou's avez donner grand pliaisi abein des gens tchi authons rejoui d'vot boûonté.
Couomme le châpitre de 2007 se freume, le chapitre de 2008 c'mmenche. J'nos prépathons pour embértchi dans l'inconnu. Sans doubte, i'aûtha des hauts et des bas dûthant cououthant d'l'année, i'autha bouons temps et des d'ssapointments. Quouaiq' rein nos est garanti j'avons l'assûthance que je sommes pas seule sus not aventûthe. Si j'mettons not main dans la main de Dgieu, i nos supportetha en tuous temps et nos guid'tha sus l'bouon c'min. Sa presence est une invitation pour nous d'accp'ter.
J'vos r'mercie tous tch'ecoute la lettre jerriaise chaque semaine, et a tuous auditeurs, que s'sait Jerri, D'guernesy, La Normandie ou n'importe eyou, Veronica m'joins en vos souhaittons tous les complyiments d'la saison, une année paisiblye, bouonne santé, et toutes bénedictions.
A LA PRECHAINE
Clifford Laisney
Viyiz étout: