Chais Clifford Laisney tchi vos souhaite le bouon-jour en vos presentons la Lettre Jersiaise aniet Dinmanche le 11 d'Avri 1999. Premièthement, trais announces concernant l's'activitées des membres et anmins d'L'Assembliée tchi support nôt ancienne langue.
Dinmanche tchi vint, le 18 d'Avri setha l'occasion du Service Annuel tchi autha lieu a l'Eglyise de la Ville c'mmenchant a trais heuthes de l'arlevée. Ou s'ethées tous les bein-v'nus. Les membres du tchoeu sonts priées d'lus rencontrer a L'Eglyise de la Ville a trais heuthes a ch't'arlevée pour une pratique en prépathation du service.
La traisieme announce concerne Samedi tchi vint le 17 d'Avri. A Hamptonne, St Louaithains les Membres du Congrer du Parler des Normands auve membres Guernesiais et Jerriais present'rons un festival de chansons, danses, recitations etc auve halles de differents produits. C'mmenchant a dgiex heuthes jusqu'à quatre heuthes et d'mie, ou s'etes garantis d'une bouonne journée, et j'espethons d'vos i vaie en bouon nombre.
Assis dans m'n'appartement d'étude en prepathation de chutte lettre, en confort et entouother d'éffets et d'memèntos d'pâthents et d'fanmillye, je'n peut selon realisé comme tchique j'pouvons etre érmerciablye de d'meuther si heutheusement. Comme i s'adonne, aniet, le sole érlithe en pleine forche dans la f'nêtre, i'a une p'tite brise de vent tchi bacholle les herbages et branques des bouais et d'arbustes, comme s'il 'taits en conversation iun auve l'autre. Y'a un air de trantchil'té dans l'temps.
Malgré toute la bieauté et natûthe tchi nos entouors, i'a des temps quand j'en sommes pas érmerciants d'nos bouon tées. J'nos pliand'ions du temps, une fais chés trop sé, une autre trop mououilli, le coûotement des nécessitées, le p'tit ertou d'intêthet sus les comptes en depôt. Je souffrons d'une certaine jalousie, tchiquefais envieurs de not vaisin. Sustout dans les papiers nationales, je liaisons envers des gens tchi ithons jusqu'à bût en orde de faithe ércliame pour tchique injustment tch'ils ont souffert.
J'avons ti raison d'nos pliandre a telle degré quand j'liaisons et j'viyons les souffrances tchi s'passe dans s'l'alentours du monde.
Tch'ést qu'authait janmais penser qu'un bieau pays comme la Yugo-Slavie sethait dev'nu dans la terriblye situation que j'le connaissons aniet. Pouvous figurer d'laissi vôt siez-vous, vos possessions, membres d'fanmillyes, animaux et tout pour tchi qu'ou s'avez travaillyi si du, et a tchulasse d'arme etre marchi dans l'inconnu, janmais pour ertouonner a vôt siez vous. Chés impossiblye pour nous d'imaginer les circonstances et conditions que chés gens enduthe sus un viage sans éspéthance.
Chés difficile de craithe que comme j'apprechons le c'mmenchement del'année deux milles, que l'homme na pas apprins de ses bêtises. Acquo une fais, chés la jalousie, et l'envie tch'est la cause de tuous ches maux.
Prions que'je j'pouvons apprendre des leçons de chés atroces, que j'pourrons etre pus aimab'lye envers nôt prèchain et étout que je n'érten'nons pas d'assister chés gens d'la Yugo-Slavie tchi sonts dev'nus deportées d'lus siex ieux.
J'Pouvons selon accepter que d'gerre a 'tait decliathée en Europe. Sans aver l'air pessimiste, i faut que j'admettons qu'la situation est grave. J'nos d'mandons ouest-que l'affaithe finitha.
Nos priethes sonts auve les membres d'armées engagis dans l'tracas d'hostilités, les gens tchi travaillye en orde d'eprouver a soulagi les besoins des refugées, et principallement pour les chefs des nations concernées dans les troublyes tchi puisse lus entre rencontrer tête a tête au pus vite a fin d'arriver en accord d'abuter la ligne de combat.
J'vos souhaite a tous paix, éspèthance et succés dans vos entreprinses chutte semaine.
A LA PRECHAINE.
Clifford Laisney
Viyiz étout: