Couomme normale, ch'ést acquo un pliaisi pour mé, Clifford Laisney d'addrechi l's'auditeurs de la langue jerriaise, aniet Samedi l'30 de Decembre 2006.
Est'che possiblye que d'main j'allons etre a célebré l'Eve d'une nouivelle année. I me r'semblye pas que l'arrivée D'Noué est si longue achteu que dans mon jeune temps. J'vos entends dithe, “Ch'est l'âge mon garçon, tu passe trop d'temps dans ta grand chaise a r'dôter, et d'meme le temps s'passe sans que tu réalise. Ch'la s'peut, j'l'admet, mais quand même la vitesse de la vie, les techniques moderne que j'en comprens pas, le viagement d'gens l'travers le monde, tout ch'la contribue au passage de temps. Les mousses d'aniet n'reste pas p'tchiots pour longtemps, dans p'tit d'temps il 's'apprendes a nâgi, une chose que j'ai pas accomplyi dans mes quatre-vingt ans. N'étant pas enmaillotées comme j'etions, i sont introduits a l'école pepiniathe aûssitot tchi pliaisse marchi et dans rein d'temps i sonts a converser au d'ssus d'l'intelligence d'lus papa. Tout ch'la aidge contribuer au passage du temps.
L'année 2006, tchi s'passe, n'a pas 'tait sans ses problemes. Quouaiqu' j'avons rejoui d'un temps calme auve un été caud et pliaisant, differentes parties du monde n'ont pas 'tait si chanceux. Des pays onts souffert des innondations d'ieau, des eruptions volcaniques, feûx d'fôrets, une continuation d'fanminne en parties du monde, et malheutheusement la continuation dgerre en Iraq, Afganistan, et troublyes en Israel et la Palestine. Malgré nos troublyes d'violence et d'insécurité la niet dans la ville et l's'alentours, et d'autes problemes inevitablyes dans autchun pays, je somme tchique-fais troubliées dés decision d'nos politiciens, et souvent prés a offri nôt avis, mais en toute somme i fonts d'lûs mûs pour la prospérité d'l'ile.
Liaisons le journal du sé, j'vai que l'industrie d'finnance a survi d'une bouonne année. Ch'ést important pour le benefice de l'ile qu'au meins j'avons un r'venu tch'aidge a remplyi le coffre du trésor. Etant que l'tourisme ne donminne pus l'ervenu et q'l'agricultuthe n'est pas si importante a l'ile ch'est important qu'aumeins j'avons un p'tit écliarté pour nos conduithe dans une direction positif.
Dûthant ch't'année, plusieurs fanmillyes onts souffert la detresse de maladie, et plusieurs que nous' a connu aut' fais ne sonts pus auve nous. Dans ma fanmillye j'avons souffert la mort de trais membres de fanmillye. J'offre ma sympathie a tous en situations patheil.
J'trouve que la s'm'naine suivant Noué est trejous un temps morose et sombre. L'excitement des prépathations pour les fêtes, l'enviêthie et l'erchevage de cartes, l'acc'atie d'presents et les responsibilitées d'côuthage presentes une reaction d'aise et d'ermerciement que acquo une fais nou peut er'toun'né a la vie paisiblye et trantchillye.
Ch'est encouotheant que les services d'eglyises et d'chapelles onts 'tait bein supportées dûthant les celebrations d'Noué. Ch'est trejous pliasant d'participer dans les celebrations d'la naissance de nôt seigneur Jesus.
Nos v'la arrivées a la fin d'un chapitre et un autre c'mmenche. J'entrons dans une nouvelle année, un temps inconnu, un temps tchi presente des opportunitées et d'ss'appointments. Ch'est a nous d'poursuivre une course d'éspethance, d'ambition et d'fouai. J'me r'souvins des mots du Rouai George 6ieme dans iun d'sés messages de Noué sus l'radio.
Couomme j'enbertchons sus un passage inconnu et sans garantie, mettez vôt main dans la main de Dgieu. Sa forche et compagnie écliètha vot c'min couomme une lumiethe dans la niet. I vos sou'thein'tha en tuous temps. Sa compag'nnie vos rasseu'tha a temps immortel.
Veronica m'joins en vos souhaittons tous une nouvelle année paisiblye, remplyie d'jouaie, et d'bouonne santé.
A LA PRECHAINE
Clifford Laisney
Viyiz étout: