Eune lettre dé 1845
A M. l'Editeur du Constitutionnel.
Moussieu,
Il ia déjà bain long-temps que nou dit que le petit Sueux n'est pas pus Stanch qui ne faut pour le parti de la “Rose,” et qui n'faudrai pon grand'chose pour le faire er-tuôner sa casaque; mais ma fé je cré qui faut qui liai quique chose de la sorte souos le vent, car autrement, comme est qui serai possible qu'ouz érêtes ieu la liste du RAT sus vote gazette, de préférence à la “Chronique,” qui bain certainement n'vé pon chonna d'un bain boin yi. Est-che qu'ou seriez à ch't'heure le “Journal Officiel?”... Enfin, qu'il en sé comme i pouorra, je sis boustrement bain seure que le peti Phlip en éra une colique qui vos le tâtera de près; - oquo bain si n'en passe pon le pas... Aça ditesmé: lequel est-che de vos deux qu'avais apostasié, ou du Connétable ou de vous?... prenais garde man bouigre, ergardais bain à chet qu'ous allais dire, car le diantre mé piesse jamais vais, si chez vous ou n'êtes pas quo fini d'avec mé... ou viyiz je n'aime pon les turn-coats... mais je pense bain qui nia pon de dangi que che sé vous, mais que chez pûtot notre brave Connétable, car che ne serai pas rain de nouvé pour li; ou savais qui soulait être des nôtres...
Je pense bain que ses gens d'armes, comme nou les appelle, lis ficheront des sottises, et qui le menicheront de le faire sauté de sa plaiche pour sa peine; mais quest qui lien est, des gens comme li se trouvent bain partout; et pis nou dit qui pépie pour rentré dans les parti qu'il a si mal servi pour tout le bain qui liont fait.
Nou dit de pus que chez un remord de conscienche qui l'a prins... un remord de conscienche!... bah! né nos élourdais pon... Si fait... oh, et bain, je cré s'em nâge que j'avons quique brise en venant, ou quique autre affaire à la WILSON... mais i s'en donnera bain de garde, car i sait bain qui n'en faudrait pas pus pour le capsizer tout-à-fait.
Il ya oquo une chose qui me fait pensé qui reserra bétôt “aigrefin;” chez que touos les “procès monstres” qui liont fait sa fortune sont finis, et qui nia pus grand'chose à gratter parmi les “radicaux;” et pis i sent que Moussieu De Carteret quest acheteu enfoncet dans la religion jusqu'es oirelles, ne pouora pus l'assistai comme autefais, et qui serai laissi quâsi tout seu avec un tas d'EMPÔTUMES qui ne connaissent pas lus main droite d'avec lus main gauche, de sorte qui n'iérai pas d'avantage pour li à se mêler avec d'itet... ches oisiaux là sont bons touos seux et je ne serais pas étonnai si se trouvaient bétôt au but de lus flûtes...
Le parti de la rose n'est pus ch'qu'il était: autefais il iavait de mâlins parmi ieux qu'y viyaient cliai, et qui savaient prendre lus monde; mais acheteu chez différent.
Ossin lus thermomètre politique est bain bas, - vère, il est quasi à TEMPÊTE; et i meniche de venir oquo pus bas entre ichin et NOÉ qui vain. I parait que chest pour chela qu'il avaient décidet de ne publier pas la liste du rât ch't'année, afin de nos gardai à tâtons quand i s'agira de faire des voix... mais je cré bain qui feront “contre fortune bon coeur,” et qui la publieront et tou, sans faire la mine de rain, mais che qu'il y a de certain chest que si ou ne l'aviez pon donnais il l'éraient gardais bain caude, les Tartuffes, et que nou ne l'érait pas pus veue que l'EMPEREUR DU MAROC...
Je sis, Moussieu, votre serviteur,
Un Hacheman
Viyiz étout: