Jean l'Achocre
Translaté en Jerriais d'achteu
Je sai un conte.
Il y-avait une feais une fame qu'avait un avé si lourdeau que nou l'appelait Jean l'Achocre. Un jeu sa methe s'en fut laver sen linge, et ou lî dit d'vant s'en aller:
Jean l'Achocre, tu garderas la maison, et f'ras buoillir la chaudière. Quand ou buordra, tu mettras d'la graisse ès chours
- Vethe, ma methe.
La fame s'en fut au dout, et dès-que la chaudière s'mint à buoillir, Jean l'Achocre ramassit l'oing qui s'trouvait dans les pots, et s'en fut en graissir les chours du gardin.
Un aut' jeu, sa methe lî dit:
- Jean l'Achocre, j'm'en vais m'en aller à la fethe, tu garderas la maison, et n'étiboqueras pon l'ouée qui coue!
- Je n'en f'rai mie, ma methe.
La methe s'en fut à la fethe, mais Jean l'Achocre s'avisit d'aller vêir l'ouée qui couait sus ses oeus.
- Ouée, s'fit-i, à la cuorêsse, ne l'dit pon à ma methe.
- “Couac” fit l'ouée.
- Hein! qu'est-que tu di là?
Si par malheur tu le fais, je t'tue à coup sè.
- “Couac” faisait tréjous l'ouée.
- Ah! qu'est-que tu di? attend-mei, attend mei!
Là d'sus, not' Jean l'Achocre teurtit l'co à l'ouée, mais quand i l'eut fait - m'est à vis - s'fit-i - i faut que j'coue l's oeus.
En êffet, aussi tôt dit, aussi tôt fait, i s'mint sus l's oeus; et sa methe quand ou r'vint d'la fethe, le trouvit accliouqui d'sus.
- Et qu'estque tu fais là, Jean l'Achocre?
- Ma methe, l'ouée est occie, et j'coue l's-oeus.
La methe ergardit, et aussi seux que j'vos l'dit, l's-oeus étaient êcllos.
Jean l'Achocre était d'age de marier - V'la pourqui, li dit sa methe, i faut que tu te d'sengourdisse, et qu'tu t'en âge au chimetière, envier autant d'ieillies que tu puorras ès hardelles quand i r'veindront d'l'egllise.
- J'ithai, ma methe.
En êffet, quant vint l'Dimanche, Jean l'Achocre se l'vit, et à syne de jeu, s'en fut à l'étable, et arrachit l's-iers à toutes les brebis, les cllutit dans ses pautes, et s'en fut à l'egllise. Quand l'êvangile fut dit, i s'pllantit à l'us d'l'egllise, et à m'sure que les filles en sortaient, i leux ginit des coups d'iei, en les juôtant d'iers de brebis.
Et tric trac,
Men conte est fini;
Et trictrac,
Men conte est aquevè.
Vot' Serviteu,
Cherubin de Biaugy
Viyiz étout: