Iun des pus grands détectis d'la littéthatuthe est Shèrlock Holmes. Lé caractéthe fut înventé par Arthur Conan Doyle en 1887 pouor l'histouaithe dé l'Êtude en Êcarlate (A Study in Scarlet), mais d'vînt pus populaithe duthant la publyicâtion d'contes dans l'magâsîn The Strand, à c'menchi en 1891. La dreine publyicâtion fut en 1927, mais l'action des contes prend pliaiche entre les 1880s et la Preunmié Dgèrre Mondiale. En tou y'a quat' romans et chînquante-siêx contes.
L'auteu n'aimait pon en tout l'grand succès d'sa criâtion et décidit d'tuer Shèrlock Holmes, en criyant qué chu caractéthe empêchait l'publyi d'apprécier ses aut' êcrits. Lé conte "Lé Problième Finna" (publié en 1893) racontit coumme tchi qu'Holmes mouothit dans eune batâle auve sén enn'mîn lé professeu Moriarty. Mais la rêaction du publyi n'tait pon chein qu'l'auteu avait espéthé. I' voulaient l'èrtou d'Holmes.
Huit ans pus tard, Conan Doyle publyit un roman, Lé Tchian ès Baskèrvil'yes. l'action d'tchi éthait prîns pliaiche d'vant la mort dé Holmes. Mais enfîn, l'auteu eut à r'nonchi, enfachi d'la grande populathité d'san caractéthe, et ressuscitit Holmes dans eune nouvelle séthie d'contes, en explyitchant qu'Holmes n'avait pon mouothi mais s'tait cachi d'ses enn'mîns - et du monde - pouor d's années.
La grande mâjorité d's histouaithes dé Shèrlock Holmes est racontée par lé caractéthe du Docteu John Watson, tchi dêcrit ses méthodes dé détection et, coumme Holmes a tréjous à explyitchi san raisonnement à Watson, les lecteurs veinnent à comprendre l'extraordinnaithe agenceté mentale du grand détecti.
Mais ch'n'est pon raîque auve lé chèrvé qué Holmes travâle. I' fait sèrvi eune arme ou ses pouaings dé temps en temps, et est prêt à s'dêdgither ou à prendre l'action à seule fîn d'rêsoudre un mystéthe. Les mystéthes rêsolus par Holmes né sont pon tréjous des crînmes, par exempl'ye dans Un Scandale en Bohème ch'est d'r'aver un photographe.
Dans la mâjorité d's histouaithes, Shèrlock Holmes démeuthe à 221b la Rue Baker à Londres, et l'Docteu Watson y châre les appartènements pouor des pauses (les mathiages dé Watson veulent dithe qu'eune partie du temps i' d'meuthe auve sa femme). Mais les détectis viagent à la siette dé crînminnels et clyîns, et tchiquefais y'a des mentions d'aut' aventuthes (janmais dêcrites) duthant les entchêtes.
À la fîn, Holmes s'èrtithe et s'en va garder des moûques à myi dans l'Sussesse, mais y'a couo deux histouaithes tchi prennent pliaiche duthant sa r'traite.
Ouaithe qu'la phrâse "Êlémentaithe, man chièr Watson" est r'connue coumme typique dé Holmes, i' n'dit janmais chenna duthant les r'cits. I' fait sèrvi l'mont "êlémentaithe" et l'expression "man chièr Watson", mais janmais les deux ensembl'ye.
Viyiz étout: