Si tu tchains à maintenin tes forches,
Ta pièche, ta raison, tan "tin",
Faut mangi autre chose que d'la caboche,
Faut bèthe autre chose que du gin.

Un bouan verre de grog, si tu le veux,
A man avis ne peut faire de ma,
Mais quand nous en arrive à deux,
Nou s'trouve bein vite en ava.

Si tu tchains à conservé ta terre,
D'après les anciens compôts,
Faut autre chose que d'la pomme de terre,
Faut d'autre fumyi qu'les guanos.

Deux-trais pouchis de 'tip top' guano
Quand la terre est en bouan état,
Sert à faire grossi la récolte
Et au sol ne peut faire de ma.

Mais ov le grog, comme ov le guano,
Ch'est de la modération ch'qui faut,
D'crainte que nou n'vende le piano,
Que le béveur ne s'trouve sus l'dos.

Pour rendre compliet man idée,
Faut dithe ocquo tchiques mots,
L'excès de guano à la terre,
A man avis est l'fait des fôs.

Comme l'épethon dans les fiancs du ch'va
Et trop de gin dans la tête,
Finis par ne faire que du ma,
Et met l'homme au nivét d'la bête.

Ainchin je l'dis, sans l'vé la main,
Je l'prédis à nos campagnards!
S'ils ont qu'menchi avec le souverain,
I' finiront avec le liard.

Ch'en t'chi fétha la ruine de Jèrri,
De ses terres et de ses gardins,
Ch'est qu'nou veux trop vite s'enrichi
Par d'autres vouais qu'les bouands qu'mins.