|
Jé m'rappelle bein qué quand j'tais p'tit N'y'avait rein tchi m'donnait pliaîthi Comme d'êt' assis sus l'genou d'Grand-péthe, A êcouter à ses histouaithes. Car touos les deux j'allions souvent Sus san j'va blianc jusqu'à Rouën, Ilà j'chang'gions pouor un j'va gris Et pis j'allions jusqu'à Paris - Au pas .... au trot .... et au galop - Ch'tait pas assez; j'criais, acouo! Mais v'là tchi m'vînt, comme veint à tous - Trop grand pouor m'assiéthe sus ses genouors; Sai-s J'avais hardi d'fanne quand même, D'êcouter à toutes ses p'tites scènes. À ch't heu d'vant tch'i' saient oubliées Jé vouos en raconte deux ou trais. Ma grand-méthe, lyi, pouor tchique raiethon, Ou n'aimait pon lus p'tite maiethon; Pouor paix aver fallait bâti Un nouvieau “châté” dans l'côti; Du cliou, des tôles et un boutchet - Et san travas fut bein vite fait. (Ou, ... tout d'suite fait) Mais Papa n'y comprannait rein.... L'fichu boutchet 'tait tréjous pliein! Pis s'apèrchut qu' les pas sus l' c'mîn Ch'tait des grand's pattes .... dé san vaiethîn. "Oh, Oh!" tch'i' s'fit, "Lé sale baloque - J'm'en vais don lî bailli un choque!" "Hé! j'm'en vais m'muchi pouor l'attendre, Eune raide bouanne léçon pouor li'apprendre". Mais i' n'arrêtit pon longtemps, Car quand l'vaiethîn fut assis d'dans .... La p'tite maiethon il trébutchit Et boulit tout avaû l'côti! Eune aut' histouaithe qué j'aimais bein, Ch'était entouor un faûcheux d'fain, Nou lî gagit tch'i' n'pouôrrait pas Dans un jour mett' eune vrégie bas; Et chutte gageaille ch'fut pouor chînq louis Et, seux, du cidre par la joudgie. Pouor quémenchi, v'là tch'allit bein, Mais --- fut prîns d'sé, nouot' faûcheux d'fain; San cidre, arrangi à l'esprès Pouor lî bailli la ..... Ah - j'avons ieu la même idée! Jé vouos asseûthe qu' nou n'fauche pon fort Quand nou-s-est prîns dé ma dans l'corps! Et don, pas mouoyen d'avanchi - A peine finni, fallait r' c'menchi! "Nou pèrd du temps... ah, ch'est d'la peste!.... Tréjous r'boutonner ses guélesses - Pouor qué j'n'aie don pas d'aut' arrêt, Jé m'en vais faûchi sans mes braies!" Lé faûcheux gângnit bein ses sou - Mais l'fain? Il n'valait rein du tout! Michael Vaûtchi |
Viyiz étout: