Les Pages Jèrriaises

Couleu d'cat tralé



Nou n'peut pon pliaithe à tout l'monde, et v'là tch'est seux quand nou pâle des pièches protégies. Faut-i' garder nos vièrs bâtisses coumme i' sont coumme des monuments, ou nou peut-i' les dêmoli pouor l'êcalop'sie du tèrrain et l'profit? Y'a-t-i' eune difféthence entre la Ville et la campangne?

J'avons un système dé pliann'nie et un Minnistre tch'en est responsabl'ye (quand i' n'est pon à s'en d'menter des horsains) et aut'fais ch'tait l'Conmité des Bieautés Natuthelles. Mais si ch'est un conmité ou un minnistre, nou trouve tréjous à r'dithe. J'avons ieu dêjà ch't' année deux exempl'yes d'hèrtchîngn'nie: la Caûminne à Marie Best et l'vièr Odéon.

La Caumine à Marie Best Pouor dé mé, jé n'sis pon contre l'èrpeindrie d'la Caûminne pouor eune pause publyicitaithe. Ch'est en tchi pouor mé, ch'est la Caûminne à Marie Best et jé n'l'appelle pon eune blianche maîson. S'ou 'tait rouoge ou couleu d'vaque ou bliue ou couleu d'rose, ou s'sait tréjous la Caûminne. J'mé d'mande si les cheins tchi sont contre la peindrie d'monuments, sont contre la peindrie des tours? Pouor dé mé, j'aim'thais bein vaie les Tours d'Archithondé, du Ouaisné, du Ho et d'la Vînde au natuthel sans êt' rilyies d'rouoge, blianc et nièr. Mais y'en a tchi sont sans doute accouôteunmés à d'itelle couleuth'thie et tchi f'thaient un protêt.

Les couleurs sont sŷmboliques. Lé rouoge est la couleu Jèrriaise et l'vèrt ch'est pouor les Dgèrnésiais. Nou vait du bliu et du jaune à Saint Hélyi, et du rouoge et du blianc ès boutiques Polonnaises. Sans doute nou vèrra du bliu, blianc et rouoge pouor les neuches Rouoyales ch't' année, épis au mais d'Juilet étout pouor la Fête Nâtionnale Française. Et toute ch't' année ch'est l'rouoge et l'jaune pouor l'annivèrsaithe d'la Nouormandie. Nou s'sait-i' satisfait d'vaie la Caûminne à Marie Best en rouoge ou couleu d'rose?

La Blianche Maîson à Washington fut blianchie, s'lon la crianche, à la siette d'la brûl'lie du bâtisse par les troupes Britanniques duthant la dgèrre en 1814. Épis l'Neunmétho Dgix, d'la Rue Downing à Londres, fut laîssi tout nièr quand nou-s'en nettissait les côtchiéthes y'a tchiques années - ch'est en tchi l'monde 'taient si accouôteunmés à la nièrchithie d'la pollution. Mais, chose tchuthieuse, la Rouoge Pièche à Moscou n'a janmais 'té rouoge.

Auve toutes ches couleurs, j'ai eune modeste proposition: tch'est qu'en est s'nou trotchait des couleurs en r'blianchissant la Caûminne à Marie Best et en peignant l'Odéon en vèrt?

Geraint Jennings

 

Viyiz étout:

 

Les Pages Jèrriaises