Trenton,
Michigan, USA.
Lé 5 d'avri, 1980.
Moussieu l'Rédacteu,
Dans au pays monarchist, quand lé Rouai meuthe nou dit: “Lé Rouai est mort - vive lé Rouai!”, eune mannièthe dé dithe qué ouaithe que l'vièr chef dé la monarchie n'est pus, ou n'est rêellement pon morte viyant qu' ou continnue souos un nouvieau chef, généralement héréditaithe.
Eh bein, l'année 1977 vit la mort d'un trésor dé la littéthatuthe Jèrriaise - lé Bulletîn d'Quart d'An d'l'Assembliée d'Jèrriaise. Heutheusement, grâce au Don Balleine, lé trésor continnue à vivre souos l'nom dé “Les Chroniques du Don Balleine”, et l'fait qué l'rédacteu des “Chroniques” est l'même comme lé chein tchi fît l'Bulletîn d'Quart d'An d'L'Assembliée d'Jèrriais un mangnifique succès promet qué ches “Chroniques” s'en vont êt' aussi populaithes comme les Bulletîns parmi les savants d'Nouormandie, et tch'i' s'en vont en fîn d'compte sé trouver dans lus biblyiothèques et dans les cheinnes d'la Nouormandie, mais d'bein d'aut' pays à l'êtrangi.
I' faut du couothage et d'l'ênèrgie pour entréprendre la responsabilité dé produithe un tel travas avau l's années, et i' faut saluer lé rédacteu, l'Docteu Fraînque Le Maistre, OBE, et l'honorer pour bein vouler continnuer à donner san temps et san talent à eune tâche si împortante pour la consèrvâtion d'nouot' fanmeuse vielle langue Jèrriaise, tchi fut la raîson d'être dé L'Assembliée d'Jèrriais quand ou fut fondée en 1951.
J'mé d'mande combein d'Jèrriais tch' ont acaté l'preunmié numétho d'ches “Chroniques du Don Balleine”? Sans doute, nou n'peut pon s'attendre qué l's Angliais en Jèrri, même l's Angliais tch'ont d'meuthé tant d'années dans l'Île tch'i' s'appellent Jèrriais, né s'en vont pon l'acater viyant tch'i' n'savent pon l'Jèrriais. Mais nou dévthait pouver s'attendre qué les vrais Jèrriais donn'naient lus support à l'objet d'prêsèrver nouot' vielle et supèrbe langue.
La preunmié chose tchi vouos frappe en r'gardant l'cont'nu du preunmié nunmétho des “Chroniques” est la variêté d'sujets entanmés par lé rédacteu et tchi sont si aîsiement r'cordés en prose et poësie dé la langue Jèrriaise - des sujets historiques, la vie du temps pâssé, chansons, cantiques, vièrs mots qué nou n'ouait pus en convèrsâtion d'nouos jours, etc. Tchi temps tch'il a dû y mettre, lé rédacteu, à ramâsser tout chenna et l'mett' ensembl'ye pour en faithe un livre - eune tâche formidabl'ye tchi n'est pon appréciée par les cheins tchi n'ont janmais ieu à en entréprendre ieune dè même.
Quand j'y pense, il a prîns siex ans pour produithe lé quatrième voleunme des Bulletîns d'L'Assembliée d'Jèrriais. Ch'est en tchi, à m'n âge j'n'ai pon grand' chance dé vaie la publyicâtion du preunmié voleunme dé ches mangnifiques “Chroniques du Don Balleine”, mais j'm'en vais êprouver à gabather jusqué là!
Les vièrs s'en vont à grands pas et l'temps s'en va v'nîn tch'i' n'y'étha pus d'Jèrriais en Jèrri. La dreine gazette de l'Île èrchue ichîn est la cheine du 31 dé janvyi. Dé même, mes nouvelles dé Jèrri sont deux mais en r'tard, mais eune lettre d'eune anmie m'apprend la triste nouvelle dé la mort d'un aut' vièr anmîn, lé Senateu Cyril Le Mèrquand, et j'prends ch't' occâsion pour faithe mes condolêances à sa veuve et sa fanmil'ye, et à san couôsîn lé Sénateu John Le Mèrquand. Tchi pèrte pour Jèrri! La fanmil'ye Le Mèrquand, c'menchant par lé Juré-Justicier John dé mémouaithe respectée, lé p'pèe au Sénateu John d'à ch't heu, a sèrvi dans L's Êtats auve un dévouement et eune distînction spéciale.
J'mé r'souveins d'la preunmié fais qué j'rencontris Cyril et John Le Mèrquand. Ch'tait en 1946, l'année qué j'mé r'tithis d'affaithes et qué j'm'en fus en Jèrri. Lé Juré-Justicier John, ex-Connêtabl'ye d'sa pâraisse, m'învitit à baithe du thée siez-li, et dans la séthée Cyril et John arrivîdrent et l'Juge mé fit à connaître à ieux comme étant un Jèrriais tch'avait fait san c'mîn à l'êtrangi et tch'était r'vénu s'èrnarder dans s'n île natale. Quant à mé, ch'la n'est pon un accomplyissement èrmèrquabl'ye, mais les vièrs Jèrriais pathaîssaient l'craithe. La chose en est qu'un tas d'Jèrriais tchi font lus c'mîn à l'êtrangi y restent à pâsser l'restant d'lus vaie quand i' sé r'tithent d'affaithes - prîncipalement s'il' ont d's êfants êtablyis là.
Lé Sénateu Cyril s'en va êt' mantchi à l'êlectricité étout. Y'a un tas d'Angliais dans la boutique, ou du mains un tas d'gens tchi n'savent pon l'Jèrriais, et j'ai veu l'Sénateu, av'nant et souôriant, aîdgi à des campangnards à rêsoudre les problèmes ou malentendus. Ch'est seux tch'i' s'en va êt' difficile à lé rempliaichi dans L's Êtats. Honneu à sa mémouaithe!
George d'La Forge
Viyiz étout: