Lé Ménage ès Feuvres, St. Ouën.
Lé 24 septembre, 1966.
Moussieu l'Rédacteu,
Dévant trouver à r'dithe, faut saver faithe: Et si nou n'sait pon faithe, faut s'taithe!, Manman nouos disait eune séthée auprès l'thée.
Tch'est tchi t'tracaches l'esprit, don, à ces sé?, Papa lî d'mandit.
Bah!, Manman lî rêponnit, S'i y'a d'tchi tchi m'nâvre, ch'est d'ouï des bûsards donner d's avis ès gens tch'en savent pus qu'ieux! J'ai 'té à la boutique ch't arlévée. J'avais bésouain d'molle graisse, et j'avais ouï qu'eune cartchaîson d'saumon 'tait pour êt' dêchèrgie hièr sus la cauchie en ville dé d'dans un navithe tchi v'nait d'Angliéterre. J'ai pensé qu'y en éthait p't êt' à la boutique aniet, mais Frainque Sélous n'en savait mème pon rein. Mais pour té dithe. Y'avait chu Mess Méquinn'tache-là, tchi soulait êt' soudard, dans la boutique - tu sai bein, ch't îla tch'a mathié la fille à Ph'lippot Boudgi tchi cliopinne. Eh bein, quand i' m'a ouïe pâler d'saumon, il a ieu l'affront dé m'dithe qué si les Jèrriais n'étaient pon si achocres i' pouorraient pêtchi tout l'saumon tch'i' peuvent mangi - ichîn en Jèrri!
Mais, Ann, Papa dit à Manman, Comment tch'i savait qu'tu voulais du saumon? I' n'comprand pon l'Jèrriais!
Eh bein, ou' dit à Papa, Il a ouï l'boutitchi d'mander à un marchand d'la ville tchi v'nait d'arriver à la boutique s'i' savait si l'navithe avait dêchèrgi sa cartchaîson. Il a ieu a lî d'mander en Angliais du mus tch'i' peut, car tu sai bein qu'les villais n'savent pon l'Jèrriais ni n'tout!
T'a-t-i' dit comment qu'nou s'y prandrait, à pêtchi du saumon en Jèrri?, Papa dit à Manman.
Oui dgia!, Manman lî rêponnit. I' m'a dit tch'i' n'y a qu'à mett' des oeufs d'saumon dans la Mathe au Seigneu, et qué dans trais ans nou n'pouorrait pon prandre tout l'saumon qu'y éthait d'dans! J'lî ai d'mandé tch'est tchi s'en va pondre l's oeufs pour mett' dans la Mathe, et s'i' s'en va c'menchi à couarder et s'assièthe dans la Mathe pour les couer! J'l'ai r'mins dans s'n êcale, ch't apèrt-là! I' pense qué les Jèrriais craient qu'la leune est faite d'eune pé d'vieau!
Eh bein, ma femme, Papa dit à Manman, I' n'a p't êt' pon l'esprit si biscâsié comme tu l'crai, ch't Angliais-là!
Bon!, s'fit Manman, T'en vas-tu m'dithe qué j'sis nieauminne assez d'craithe qu'les paîssons ponnent comme des poules? Ch't Angliais-là a l'esprit pointu comme eune brioche carrée s'i' pense qué j'peux craithe d'ité. Il a fait feu par la tchulasse, valet, et j'l'ai r'mîns à sa pliaiche!
Eh bein, Papa lî dit, I' n'est quand-mème pon si achocre comme tu pouorrais l'craithe, ouaithe tch'i' s'trompe quand i' crait qué l'saumon pouorrait êt' êl'vé dans La Mathe au Seigneu, viyant tch'i' n'y a pas eune rivièthe tchi condis d'La Mathe à la mé. Tout saumon est né à l'ieau douoche, dans un coin trantchil d'eune rivièthe, ou dans eune grand' mathe ou un lac par ioù qu'eune rivièthe passe ou travèrse en s'en allant à la mé. Quand l'saumon est grand assez pour viagi, i' d'vale la rivièthe et s'en va à la mé. Eune fais en mé, il y fait sa d'meuthe et y reste pour eune longue duthée d'temps - p't êt' dé trais à sept ans - et pis i' s'en r'veint amont la mème rivièthe jusqu'à san lieu d'naissance. Arrivé-là, i' pond des oeufs et s'meuthe!
Mais comment tch'i' r'connaît la mème rivièthe et la mème mathe, s'il a d'meuthé dans la mé pour si longtemps?, s'fit Manman.
Jé n'sai pon, ma femme, Papa lî dit. Ch'est iun des mystèthes dé la natuthe qué nou n'sétha probabl'yement janmais. Tchiquefais, quand eune rivièthe a des rapides, comme y'en a à La Côte et en Améthique, ch'est un spectacl'ye d'vaie l'saumon ramonter la rivièthe contre les rapides et l'couothant. Pour gangni c'mîn i' sont forchis d'sauter en l'air et en avant contre lé couothant jusqu'à tch'i' trouvent d'l'ieau calme pour pouver nouer souos l'ieau comme un paîsson l'fait ordinaithement.
Tch'est tchi t'a dit tout chen'na, Papa?, j'lî d'mandis.
Eh bein, man p'tit, i' m'dit, J'apprîns ch'la - et bein d'aut' mèrvelles dé la natuthe - quand j'tais à La Côte dévant mathier ta Manman. La Côte est partie d'La Province dé Tcheubec au Cannada, et la provînce est r'nommée pour l'abondance dé saumon dans cèrtaines dé ses rivièthes. Nou-s apprand un tas d'choses à l'étrangi, et tant pus qu'nou-s en apprand tant pus nou veint à r'connaître la mèrvelle des oeuvres du Bouan Dgieu tch'a duit ses crêatuthes - mème les paîssons - dé la sagesse et du pouvé nécessaithe pour combattre l's êpreuves dé lus vie, et d'propagi lus sortes pour lé bénéfice des êtres humains!
J'voudrais bein y'aller, mé, à La Côte, vaie l'saumon ramonter les rivièthes!, j'dis à Papa. Eh bein, man garçon, i' m'dit, Tu pouorras p't êt' bein y'aller quand tu s'sas pus grand. Nou vèrra si tu-apprands bein à l'êcole!
George d'La Forge
Viyiz étout: