Trenton, Michigan,
U.S.A.

Lé 2 d'novembre, 1974.

Moussieu l'Rédacteu,

À m'suthe qué l'avion m'envolait houors Jèrri en c'mîn pour l'Améthique y'a eune dgiêxaine dé jours, j'èrgardais la Baie d'St. Ouën dispathaître d'veue et j'mé d'mandais tch'est tchi fait les Jèrriais comme mé tchitter l'Île - meme pour un p'tit d'temps, et comme la veue d'l'Églyise dé St. Ouën dispathaîssait, j'envisageais, dans m'n idée, les choses tchi m'faîsaient eune împression dans l'esprit d'ma jannèche tch'a duthé toute eune vie, comme, par exempl'ye, la pensée qu' nouos églyises pârouaîssiales sont un héthitage précieux ès Jèrriais, et qué l'sanctuaithe dé châque églyise est l'ambassade du Rouoyaume des Cieux dans châque pâraisse. Et j'pensais ès noms illustres Jèrriais sus les pliaques commémoratives en d'dans d'ches églyises et sus les tombieaux dans les chînm'tchiéthes - comme, entr'autres, les d'Carterets, les Pipons, les d'Auvèrgnes et les Lempriéthes.

I' m'vînt dans l'esprit que ouaithe qué lus noblièche 'tait enrêchinnée d'vièrs temps, ch'tait p't-être viyant tch'il' avaient bein voulu tchitter l'Île pour un p'tit d'temps tch'il' 'taient dév'nus illustres. V'la tchi lus avait donné l'opporteunité d'rendre sèrvice à la Couronne et dêvelopper des talents tch'éthaient p't-êt' resté endormis s'i' n'avaient janmais tchitté l'Île.

Y'a, sans doute, deux sortes d'Jèrriais, les cheins tchi restent dans l'Île et les cheins tchi s'en vont au liain. Les tombieaux nouos ramémouaithent qué ch'ti-chîn mouothit en Australie ou dans l's Îndes ou en Afrique, et qué ch'ti-là 'tait à la Bâtale dé Waterloo ou à la dgèrre des Boèrs. Nou trouve des Jèrriais f'nés partout l'monde, et y'a pus d'noms Jerriais sus les tombieaux dans les chînm'tchiéthes à La Côte qué nou n'avait dans la gâzette en Jèrri à ch't heu, et nou trouve acouo des Jèrriais vivants là tchi n'ont pon 'té nés en Jèrri, mais y'a tréjous tchique pétite chose dans lus minne ou dans lus d'vis tch'est Jèrriaise. J'm'èrsouveins d'aver bein connu un Jèrriais à Ottawa, au Cannada, tch'avait nom Fraînque Hamon et tch'avait 'té né dans l'Île dé Bonaventure endrait l'village dé Pèrcé, mais tch'etait Jèrriais dans l'âme.

Ch'est r'mèrquabl'ye qu' un p'tit pays comme lé nouotre ait produit tant d'soudards et d'matelots tch'ont fait honneu à l'Île. Sus les pliaques dans l's églyises nou-s-en vait à gogo - des Lieut'nants, Cap'taines, Mâjeurs, Coronels et mème des Généraux et d's'Amithas. Dans l'chînm'tchiéthe dé St. Martîn y'a un tombé à la mémouaithe d'un officyi nommé Richardson - probabliément d'la mème fanmile comme lé Canon et l'Avocat Richardson - tchi fut bliessé à la Batâle du Nil auve le fanmeux Amitha Horatio, Lord Nelson, et tchi mouothit d'ses bliesseûthes pas bein d's années auprès en Jèrri. Et i' n'faut pon oublier nouot' Amitha Ph'lippe d'Auvèrgne, Prînce dé Bouillon. Lé célébre auteur, Messire Gilbert Parker, êcrivit un livre au sujet dé ch'tî-là appelé The Battle of the Strong. Dans ch't histouaithe, l'Amitha est appelé Philip d'Avranches. L'av'ous liu?

Ch'tait un Général Messervy tchi c'mandait l'armée d'l'Înde et du Pakistan au c'menchement d' 1959. Et l'Général Neville Godfray Hind, Juré-Justicier d'la Cour Rouoyale, 'tait en Égypte auve lé Feld-Maréchal Lord Wavell à chasser l's Allemands dé d'dans l'désèrt. Y'avait, étout, l'Amitha Edouard de Faye Ernon, fis d'Moussieu Edouard Binet Ernon, Écrivain et Député, qu' j'ai connu quand j'tais clèrcot d'êcrivains dans La Rue des Trais Pigeons.

La fanmile de Carteret est bein èrpresentee sus les pliaques dans l'Églyise dé St. Ouën. Iun des pus jannes 'tait Midshipman dans la Marine Rouoyale quand i' pérdit la vie à la Batâle dé Jutland à la dgèrre de 1914-1918. Et dans l'chînm'tchiéthe un tombé nouos dit qu'un janne lieut'nant d'Auvègne fut tué à chutte dgèrre-là étout.

En apprèchant la côte d'Angliétèrre j'pensais à eune aut' dgèrre: La cheinne dé Hastings en 1066. V'la tchi m'ramémouaithit qu'ma m'mèe, née Giffard, 'tait d'eune fanmile bein èrprésentée dans chette-là, et tchi fut illustre en Angliétèrre auprès la dgèrre. Walter Giffard, Seigneur dé Longueville en Nouormandie fournit trente navithes au Contchérant et li'aîdgit à gangni la victouaithe sus l'camp d'batâle.

Les Giffards produisîdrent des grands gens d'églyise. William Giffard tchi mouothit en 1129, fut Êveque dé Winchester et Chancelier du Rouai Dgillaume Deux. Dans san temps, nouos dit l' Encyclopedia Britannica, i' fit eune mangnifique restauration d'sa cathédrale. Hugh Giffard, dé Boynton, dans l'Comté d'Wiltshire, fut l'péthe dé Godfray Giffard (C. 1235-1302) tchi fut Êveque dé Worcester et Chancelier d'Angliétèrre en 1265, Êveque de Bath & Wells en 1264. Il' tait Archêvêque dé York quand Henri Deux mouothit en 1272 et d'vînt l'chef dé trais Régents tchi gouvèrnîdrent l'Angliétèrre jusqu'au r'tou' d'Edouard Preunmyi en 1274. L'Archêvêque li-mème mouothit en 1279 et fut entèrré dans sa cathédrale (York Minster).

Comme l'avion arrivait à Londres, j'pensais au fait qué la fanmile Giffard, si nombreuse en Jèrri l'temps pâssé qué ieune dé nouos baies fut nommée Le Havre Giffard, n'a pon fort d'èrprésentants dans l'Île dé nouos jours. Tel est l'pâssage du temps!

George d'La Forge
 

Viyiz étout: