Mousieu l'Rédacteu,
Ouaithe tch'i' y'a un vièr diton tchi nouos dit tch'i' n'faut pon sauter la brecque dévant y v'nîn, y'a dêjà des membres d's Etats tchi veulent mett' lus pids dans les souliers au Sénateu Cyril Le Mèrquand, fanmeux gardgien d'nouos sou dans la Chambre Législative. Jé n'sis pon trop seux quantchi qu' la préchaine êlection pour Sénateu étha lieu, mais i' m'sembl'ye aver ouï tch'il a acouo un an, pus ou mains, à faithe. Et pourtchi s'èrtither à 75 ans s'i' s'trouve en bouanne santé? Un homme dé sa capacité tch'a m'né eune vie trantchil'ye et tch'est “sain dé corps et d'esprit”, comme dîsent les Ecrivains quand il' êcrivent vouot' testament, peut vivre aîsement jusqu'a chent ans, et j'espéthe lé vaie s'dêcliather candidat acouothe eune fais quand la préchaine êlection veindra sus l'tapis. Et si l's êlecteurs ont autcheune èrconnaissance pour ses mangnifiques sèrvices dans L's Etats avau l's années, i' vot'tont pour lî r'mett' pour eune aut'gestion.
L's aut' Sénateurs tch'ont tant d'ambition peuvent bein attendre et apprendre un aut' vièr diton tchi nouos dit qué “châtchun à san tou à monter en cârrosse!” Et qu'la Cârrosse des Finnances a bésoin d'un cocher d'expéthience et d'eune forte main sus les brides pour la condithe sans avaries lé travèrs des rues dêpenseuses des conmités.
V'la tchi m'fait pester quand j'vai des membres du souô-dîsant parti démocratique tchi n'sont pon Jèrriais êprouver à nouos dithe combein mal gouvèrnés qué j'sommes viyant tch'i' n'sont pon dans L's Etats ieux-mèmes. I' n'ont pon apprînt l'diton tchi nouos dit qué “Le chein tch'a quat' sou et pas d'dettes a plieine pouchette!”, et ch'est seux qu' auve lé bouan mênage dé nouos sou par lé Sénateu Cyril Le Mèrquand, nouot' trésorerie a plieine pouchette.
J'sommes bein d'aver des membres dé san calibre du Sénateu Ralph Vibert, OBE, dé tchi ous-aviez eune mangnifique articl'ye dans ieune dé vouos gâzettes dreinement, et jé l'félicite pour l'honneu qu' Sa Majesté la Reine, nouot' Duc, lî'a accordé. J'n'ai pon d'run dans chutte lettre pour les nommer touos, les membres d's Etats, mais nou peut dithe qu' en général j'avons des honnêtes gens d'bouan calibre à nouos r'présenter dans la Chambre, et ch'est un sîngne dé l'întelligence des êlecteurs tch'ont voté pour les mettre là.
J'vai dans la gâzette qué la feunmthie s'en va êt' d'fendue dans l's avions tchi volent d'ichîn en Aur'gny. Eune raide bouanne idée, prîncipalement comme ch'est des p'tits avions. Pour iun tchi n'feunme pon, i' n'y a rein d'pus d'sagriabl'ye qué d'aver à heunmer la feunmée des cigarettes d'aut' pèrsonnes lé tou d'li. J'm'èrsouveins qu'eune fais en Améthique j'tais dans eune “motor coach” en c'mîn dé Fort Lauderdale à Miami, assis entre deux femmes tchi feunmîdrent tout l'long du c'mîn d'vîngt-chîn milles, et dans l'banc en d'vant d'mé, trais pèrsonnes sus quatre 'taient à feunmer étout. Nou pâle d'êt' enfûntchi! Ch'est assez drôle, mais i' m'sembl'ye tch'i' y'a pus d'femmes qué d'hommes tchi feunment à ch't heu. Heutheusement, i' y'a eune section d'pliaiches rêsèrvées pour les cheins tchi n'feunment pon dans les grands avions tchi font l'trajet en d'ssus d'l'Atlantique.
I' pathaît, d'après un p'tit but dans la gâzette, tch'i' y'a des diplômes d'accordés pour êt' aubèrgistes à l'av'nîn, et qué douze êtudiants ont pâssé l's examens du “Brewers Society”. J'éthais aimé mus vaie les noms dé douze êtudiants pour êt' minnistres dans l'Eglyise, mais j'pense bein qu' ch'est à châtchun à chouaîsi san mêtchi dans la vie.
Nou continnue à vaie des grèves annoncées ichîn et là en Angliétèrre par les sŷndicats des travailleurs, et nou sé d'mande comment qu' l'îndustrie et l'conmèrce d'un pays peut continnuer à fonctionner profitabliément souos des conditions d'même. Quantchi qué l'ouvriyi s'en va appendre qué san bein-être dé san maître ou d'la maîson d'conmèrce tch'est san gângne-pain?
George d'la Forge
1977
Viyiz étout: