Fort Lauderdale
Florida
U.S.A.
Lé 29 d'octobre, 1966
Moussieu l'Rédacteur.
Comme lé temps s'passe ! Y'a tchînze jours aniet j'tais acouo en Jèrri. Y'a eune sémaine j'tais à Trenton dans l'Michigan. A ch't heu j'sis à tchînze chents milles dé là ! Et i m'sêmbl'ye qué tout ch'la s'est passé dans deux-s'trais jours! Pourtant, j'ai 'té trais jours au volant d'man moto, et j'ai travèrsé les grand' routes des Êtats d'Ohio, d'La Virginie dé l'Ouest, d'La Virginie, des Carolines du Nord et du Sud, d'Georgie, et d'La Floride!Mêcrédi tchi vient, j'm'en vaie auve mén anmîn d'ichîn. (j'tais auve li en Allemangne dans l'mais d'août de ch't'année) à New York, ou-est qu'san grand baté s'trouve pour le moment. À bord de chu baté-la (nou peut y couochi siez pèrsonnes) j'allons r'vénin en mé jusqu'ichîn pour lé mettre à s'n amathage dans l'canal en d'vant d'sa maîson, pour pouver l'faithe sèrvi à aller à la pêque au large de chutte cité ch't hiver. Chu viage-là s'en va nouos passer l'temps pour les préchaines trais s'maines!
Dévant tchitter man fréthe Fraînque à Trenton, Michigan, j'passînmes la maîntchi d'la niet à pâler d'Jèrri. "Y-a-t-i' ieu fort dé changements dans l'île ches dreines années?" i' mé d'mandait. Tu n't'en apèrchait p'têt pon trop, des changements, té tch'y vas touos l's ans!
Si fait, ma fingre, j'lî dis. I' faudrait êt' aveugl'ye pour né vaie pon les changements tchi s'passent touos l's ans en Jèrri. À c'menchi, nou vait des neuves maisons partout. Tu t'èrsouviens tch'i n'y avait pon eune seule maison entre l'êcole dé La Mouaie et Les Rouoges Maisons. Eh bein, y'en a tout l'long d'la route à ch't heu. Y'en a tant ou-est qu'nou-s allait au camp soudarder qu'ch'est comme eune pétite ville. En allant des Rouoges Maisons pour St. Pièrre, y'a très longues rangies d'maisons à gauche auprès du Don Bridge du temps passé, et eune rangie d'boutiques et d'banques à drouaite, et pus loin à drouaite ch'n'est que d'maisons. Eune partie considérabl'ye d'la Pâraisse dè St. Pièrre a dispathu, absorbée dans l'empliaichement d'aérodrome. Mais ch'n'est rein qu'eune petite partie d'l'Ile, tout chenna. Nou vait des maisons en train d'êt' bâties un mio partout en Jèrri. Heutheusement, y'a acouo tchiques Jèrriais par les c'mîns, mais les vielles fanmiles Jèrriaises dispathaîssent, et nou ouait pus d'Angliaichin'nie qué d'Jèrriais. Même dans la Cour Rouoyale et dans l's Êtats, ch'n'est pon souvent qu'nou ouait la langue Française eune fais qué l'Greffyi a prononcé la priéthe.
Quand nou va dans l's offices des Êcrivains à ch't heu, ch'est quasi tréjous des jannes filles en robes en d'sus du g'nou, et des gu'veux tchi lus muchent un yi, tchi vouos font la beinv'nue! Et ch'est tréjous en Angliais - ouaithe tchi' faut avouer qu'Moussieu Jeune a eune ségrétaithe, Mlle. Margaret de Gruchy, tchi pâle lé Jèrriais comme i' faut! J'm'èrsouveins qué quand j'tais dans l'office à Moussieu Binet d'vant la dgèrre de 1914, i' n'y avait pon d'filles ou d'femmes dans l's offices dé chu temps-là. Ch'est drôle quand nou veint à y penser d'nouos jours, mais à ch't êpoque-là nou pensait qu'les filles n'étaient qualifiées qu'pour êt' couotuthièthes ou modistes et femmes dé mênage. Sans doute, les garçons tch'étaient commis dans l's offices 'taient là comme apprentis-êcrivains, et i' fallait d'l'ambition et un tas d'êtude pour passer l'examen. Si un janne homme restait dans l'office pus longtemps qu'les sept ans d'apprentissage, i' fallait tchi' s'contentîsse dé vivre maigre - à mains tchi' ieûsse des sou dans la fanmille - car l's êcrivains d'y'à souoxante ans n'payaient pon fort dé salaithe à lus commis!
''Quand jé r'vînt d'la dgèrre en 1919, j'failli à tchaie quand j'vis eune janne fille dans l'office a Moussieu Binet - Mlle. Maria Amy! Jé n'sai pon s'ou' fut la preunmié fille à travailli dans 'Hill Street', mais ch'tait cèrtainement la preunmié fais que j'en vis ieune là !''
Et la politique ?, Frainque me dit. Tch'est tch'en est ?
Eh bein, j'lî dis. I' s'en va y'aver eune êlection pour Sénateur l'préchain mais. Lé Sieur Stanley Le Ruez, un bouan viér Jèrriais, est sus les rangs - et j'lî souhaite jouaie et succès ouaithe qué j'aimethais bein mus l'vaie atout la rouoge robe sus l's êpaules et assis sus l'Banc d'Justice qué Sénateu. Mais y'a eune chose tch'est certaine : Les Jèrriais dev'thaient êlithe lé Sénateur Cyril Lé Merquand à la tête dé touos l's autres. A m'n idée, il est un homme îndispensabl'ye dans l's Êtats. Il est au-fait, orateur, honnête et consèrvateur, et il est brillant comme Président du Conmité des Finnances. Y'a des campangnards tchi craient tch'il est dêpenseux. Ch'est du niolîn ! Des fais sans nombres il a avèrti l's Êtats d'la folie d'lus dêpenses et qu'v'la tchi n'peut pas continnuer ! Si l's êlecteurs ont d'l'avis, i' li don'nont sa rêcompense en votant pour li et pour lé bein d'Île en même temps !
George d'La Forge
Viyiz étout: