San Antonio, Texas,
U.S.A.
Lé 17 dé févri, 1968.
Moussieu l'Rédacteu,
La vie 'tait duthe pour Cap'taine et Matelot à bord des navithes à vailes, Papa, tch'avait navidgi, m'dîsait eune séthée auprès l'thée quand j'tions assis au pid du feu quand j'tions mousse. Et, pâlant d'Cap'taines, i' y'en avait tch'avaient d'drôles d'idées! I' s'adonnait qué j'fis un viage dans un grand navithe tch'allait au Brési, et l'Cap'taine dé chu navithe-là s'vantait d'êt' aussi bouan comme autchun docteu à souangni les membres dé s'n êtchipe quand il' 'taient malades!
Les naviguants apprannaient vite à discèrner l's êcants d'lus Cap'taines et Contrémaîtres, et iun d'ieux, un malîn ouaîsé tch'avait nom Ph'lippe Espiard, sé décidit d's'èrposer pour eune sémaine ou deux. Quand ch'tait san quart eune matinnée i' dit au Baûsouîn tch'il 'tait malade, et dé l'dithe au Cap'taine!
Né v'la l'Cap'taine tch'arrive sans l'châté atout sa bouêttée d'ôtis à docteu et chînq ou siex boutelles dé méd'cinnes, et s'mint à tâter l'souô-disant malade partout. Lé Ph'lippe faîsait la minne d'aver ma dans l'estonma, et faîsait des pliaintes châque fais qué l'Cap'taine mettait sa main sus san ventre! Quand i' fut finni d'tâtonner l'Ph'lippe, lé Cap'taine dit ès autres tch'il 'tait bein malade. Il env'yit l'couque à faithe du bouoillon dans la caboûthe, et li dit dé v'nîn li'en donner eune tchul'lée toutes les démi'heuthes, et i' dit au Contrémaître dé lî mettre un fianné caud sus l'estonma, et dé l'changi toutes les heuthes!
Quand l'Cap'taine vînt l'vaie dans la matinnée, l'Ph'lippe li dit, tch'il 'tait un mio mus, mais qu'la fouaiblièche li'avait tchaie dans les gambes, et l'Cap'taine 'tait ordgilleux comme un poux sus du v'lous quand Ph'lippe l'appelit 'Docteu!' I' donnit d's ordres ès aut' matelots d'frotter les gambes à Ph'lippe atout eune mannièthe dé blianche méd'cinne. Il' en 'taient enorfantés, car i' ventait la pé du dgiàbl'ye et il' 'taient à court d'un homme sus l'pont! I' m'nichîdrent dé fliantchi l'Ph'lippe hors-bord et i' l'dit au Cap'taine - tch'en fut bein mârri! 'Ou n'avez pon d'honte?' i' lus dit. 'De pâler d'mème d'un pouorre malade?' Ou' n'savez pon l'moment qu'la maladie pouorrait vouos mett' sus l'fi du dos vous-mêmes!"
V'la tchi lus baillit eune idée. Lé lend'main au matin il' taient toutes malades. Et l'Cap'taine portait ses ôtis d'docteu partout et faîsait l'Contrémaître et l'Baûsouîn lus donner du bouoillon et lus frotter l'estonma toutes les démi heuthes!
Lé Contrémaître 'tait comme un fo! Toute sén étchipe à faithe la minne d'êt' malades, et l'Baûsouîn - auve l'aîgue du tchèrpentchi et du mousse à faithe tout l'travas sus l'pont! Quand i' s'en pliaingnit au Cap'taine et lî dit qu'les matelots n'taient pon pus malades qué l'tchian-d'bord, lé Cap'taine lî dit tch'i' dév'thait aver honte dé pâler d'mème des pouorres afflyigis, et tch'i' dév'thait êt' ordgilleux d'sèrvi souos un Cap'taine tchi savait comment s'prandre à les soulagi dans la mînsèthe dé lus afflyiction!
Le Contrémaître 'tait à but d'pacienche. I' prînt l'Baûsouîn d'côté, et quand les deux avaient distchuté l'affaithe pour eune volée, il eut eune idée : 'Va m'ramâsser un boutchet!', i' dît au Baûsouîn. Quand l'boutchet arrivit, i' mînt eune quarte dg'ieau salée d'dans, eune potée d'vèrnîn qué l'tchèrpentchi li donnit, du savon, d'la tathe, eune pînte d'huile dé mouothue, deux-s'trais patates pouorries, un héthan tch'était gâté, d'ieau dans tchi tch'il avait lavé ses cauches et sa c'mînse dé travas, et eune démié-livre dé p'tun tch'i' ramâssit dans la chambre du Cap'taine quandis tch'il 'tait à tâter l'pouls des souô-dîsant malades. I' mêlachit ch'la bein sans l'boutchet atout un bâton, et quand l'Cap'taine 'tait à mangi san dîner, i' d'valit dans l'châté atout sa bouqu'tée et dit ès malades. 'Né v'chin eune êclyichie d'méd'cinne qué l'Cap'taine m'a ordonné d'vouos faithe avaler. Mais pas pus d'eune pînte touos les quarts-d'heuthe! J'allons c'menchi auve Ph'lippe, tch'a 'té malade lé pus longtemps! Allons, Ph'lippe, avales n'en eune bouanne gorgie! Ch'est pour tan bein! Lé pouorre Ph'lippe en avalit eune gorgie et faillit d'êtouffer quand i' gouôtit chu mêlange-là!
'J'sis mus!' i' dît au Contrémaître. 'Jé m'sens dêjà pus fort!'
'Oh, mais nou-fait', l'Contrémaître lî dît, 'Pas la preunmié lache! I' faut li'en donner eune deuxième lache pour lé r'dgéthi!' i' dît au Baûsouîn. 'Aigues-mé à l'endgèrdgichonner!'
'Jé n'm'en vais pon en r'baithe mème un lèrmîn pour autcheune pèrsonne!', sé fit l'Ph'lippe, en sautant hors dé sa cabanne et m'ttant ses braies. 'J'sis mus, j'vouos dis, et j'm'en vais sus l'pont!'
'Eh bein, i' faut en bailli eune lache ès aut' malades!' s'fît l'Contrémaître.
I' n'eut pon la chance dé les faithe en baithe. Il' 'taient touos dêjà d'but et à lus habilyi quand il appréchit d'ieux atout san boutchet, et i' ramontaient sus l'pont justément comme lé Cap'taine s'en v'nait pour vaie comment tch'il' 'taient! 'Là!' s'fît l'Cap'taine au Contrémaître. Tu vai bein qué j'm'y r'connais à r'dgéthi les malades, les r'vélà tous d'charme!'
Lé Contrémaître fît un clyîn au Baûsouîn. I' n'y eut pon d'aut' malades chu viage-là!
George d'La Forge
Viyiz étout: