Fort Lauderdale, Florida,
U.S.A.
Lé 29 dé mar, 1973.
Moussieu l'Rédacteu,
I' m'sembl'ye qué j'n'ai fait qu' féliciter des mêssieux à ches drein pour lus appointements ès hautes fonctions d'l'Île et d'la Couronne, mais la gâzette du 13 févri, tchi veint d'arriver, en mentionne acouo un autre, et ch'est auve grand pliaîsi qué j'félicite lé Révérend Peter Geoffrey Kevitt Manton à l'occâsion dé s'n appointement comme Vice-Douoyen d'l'Île. Comme i' l'dit li-méme, ch'n'est pon seulement un honneu personnel, ch'est étout un honneur pour la pâraisse dé St. Jean, et j'sis bein content d'vaie qué Moussieu l'Douoyen à seu apprecier sa vaieu. J'sai bein, sans doute, qu'un tas d'gens craient tch'il à d'drôles d'idées, l'Révérend Manton. Eh bein, v'la tchi m'ramémouaithe qué j'dai en aver étout, d'drôles d'idées, car en liêsant ses articl'yes dans l' “Pilote” j'ai tréjous 'té d'accord auve il, et il a souvent exprînmé mes pensées, partitchuliéthement en ch'tchi concèrne la tendance dé mutiler les sèrvices dé l'Églyise et d'affaiblyi sa disciplinne et ses sŷmboles. Et janmais l'monde n'a ieu tant bésoin d'disciplinne comme dé nouos jours. Ch'est seux qué s'i' y'a mouoyen d'ravigoter la vie d's églyises en Jèrri, i' n'y a pon un minnistre pus capabl'ye dé l'faithe qué l'Vice-Douoyen Manton!
La longue lettre du Sieur Wilfred P. Bridgeaux d'Ottawa, au Cannada, mentionne, entr'autres Abner Bisson, dans san vivant propriêtaithe dé Percé “Rock House”. V'la tchi m'ramémouaithe qu' Abner sé r'tithit d'affaithes et s'en fut d'meuther en Jèrri en mil neu chent quarante-six, la mème année qué j'm'êrtithit d'affaithes étout, et j'nouos rencontrînmes souvent en Jèrri. Malheutheusement, i' n'est pus. I' m'sembl'ye tch'i mouothit la mème année qu'un aut' Jèrriais d'La Côte pâssit l'pas - Ernest Bertram, d' “Seymour House”, La Rocque, aut' fais gérant pour les Robîns à l'Anse au Griffon.
J'avais ouï pâler d'Abner Bisson longtemps d'vant l'aver connu pèrsonnellement, car il 'tait l'fis du bouanhomme Ouoyamme Bisson, gérant d “La Nouvelle Chronique”, et quand j'allais vaie m'n anmîn Edwin John (“Jock”) Luce, “Mess Bisson”, comme il 'tait connu par touos les lecteurs de la gâzette, mé pâlait souvent d'san fis Abner tch'était à La Côte, et la preunmié fais qu' j'allis à Percé j'mé fis à connaître à chu fanmeux Abner, et i' m'învitit à rester à diner à l'hôtel.
Comme son p'pèe, il 'tait charmant, et comme touos les vrais Jèrriais il 'tait hospitalyi. Il avait mathié Mdlle. Biard, fille d'un Jèrriais d'chu nom-là tch'était conmèrcant à Percé, en preunmié neuches, et eune démouaiselle Miller en s'gonde neuches. Ou mouothit i' dait y'aver neuf ou dgiex ans. J'tais en Jèrri dans l'temps et j'allis à s'n entèrrement à l'Églyise dé St. André.
J'sis d'accord auve lé Sieur George W. Croad quand i' nouos dit dans sa lettre, publiée dans la gâzette, qué ché s'sait bein întérêssant d'saver tch'est tchi d'vînt des siex frèthes à Lillie Langtry. Y'a tchiques années l'liêsais dans un livre public en Améthique qué iun d'ieux 'tait gentiment rêvilyi et farceux, et qué dans l'temps tchi d'meuthait auve sa soeu dans l'Probytaithe, la police avait ieu à le r'prînmander viyant tch'il avait mîns un lîncheu sus sa tête et êffrité les gens dans la route auprès du chînm'tchiéthe. Appathemment, touos les garçons lus en fûdrent houors Jèrri, ouaithe tch'i' m'sembl'ye aver liu tch'i y'en avait iun ès neuches à Lillie auve lé Sieur Langtry. Y'a trais ans j'allis à Langtry, dans l'Êtat dé Texas, supposêment nommé en s'n honneu, vaie lé p'tit bâtiment en bouais tch'était l'Siège dé Justice “West of the Pecos” (“Pecos” est l'nom d'la rivièthe à côté) du Juge Roy Bean, admithateu d'la célébre Lillie. La municipalité d'Langtry à présèrve l'bâtiment, tchi porte lé nom de “Jersey Lillie” exactement comme il 'tait dans l'temps du Juge Bean et d'la visite là de Lillie lyi-mème auprès la mort du Juge. À ch't occâsion-là, lé pistolet du Juge lî fut présenté, et i' m'sembl'ye tch'il est actuellement en veue dans l'Mûsée d'la Société Jèrriaise.
J'vai qu' les travailleurs de Jèrri sont prêts à prendre “action îndustrielle” (actuellement, tch'est qu' ch'la veurt dithe?) pour mett' fîn ès procédés tch'apportent un exces d'profit ès maisons d'conmèrce, et qué ch't année d'êlection est l'temps d'êlithe des Députes tchi s'en vont châtchi L's Êtats à en faithe dévé. Les travailleurs dév'thaient en meme temps prendre les m'suthes nécessaithes pour aboli les grèves, tchi hauchissent les gages, un procédé tch'est tréjous la base de la renchiéthe dé tout ch'qué nou-s-acate, et d'soumettre toutes tchestchions d'gages et d'travas à l'arbitrage.
Les malfaiteurs tch'ont gavachi bouais et flieurs dans les gardîns à Grouville méthitent d'êt' punnis. Si ch'est des jannes gamîns i' méthitent la badgette. La destruction des flieurs dans les pars et gardîns d'l'Île tchi méthite d'êt' punnie sévéthement, et j'espéthe qué la Police a gaffé les malfaiteurs.
George d'La Forge
Viyiz étout: