Trenton, Michigan,
U.S.A.
Lé 18 novembre, 1972.
Moussieu l'Rédacteu,
En chèrfouoillant l'aut' jour parmi des vièrs livres d'cantiques dans la huche tch'est dans l'consistouaithe dé l'Églyise dé St. Paul à Baltimore, dans l'Êtat d'Maryland, iun des Seurvillants trouvit un dotchûment, daté d'l'année mil siex chent nénante-deux. Il 'tait êcrit en Angliais, et i' nouos donne des avis tchi s'saient aussi bouans au jour d'aniet comme il' taient y'a quâsi trais chents ans! J'en avons mème pus d'bésoin à ch't heu à cause du tîntamârre dé la vie d'nouos jours et du manque dé bouanne condite engendré par les moeurs actuelles.
N'en v'chin eune intèrprétâtion, autant qu' possibl'ye, en langue Jèrriaise :-
“N'séyiz pon tréjous en hâte et en prêsse pour tout faithe. Prannez la vie trantchil'ment, et l'temps comme lé Bouân Dgieu vouos l'donne. Autant comme il en est possibl'ye et raisonnabl'ye, séyiz en bouân rapport auve tout l'monde. N'éyiz pon d'peux d'faithe à saver vouot' véthitabl'ye pensée d'eune faichon fèrme et autoritouaithe s'ou-s-êtes seux d'vouot' coup, mais en mème temps i' faut êcouter chein qué l's aut' ont à dithe - mème les p'tits esprits et l's innouothants - car il' ont autant d'drouait à la pathole comme les cheins tch'ont d'fortes idées.
“Mêl'ous d'vouos affaithes, mais n'vouos mêlez pon parmi les bagouleurs et mauvaises langues, car i' gâtent les bouannes moeurs et dênigrent l'caractéthe. S'ou-s-êtes enclyîns à vouos compather auve d'aut' pèrsonnes, ou n'y trouvethez pon d'satisfaction, car i' y'en étha tréjous tchitch'uns pus avisés et d'aut' pus bêtes qué vous.
“Profitez des bouannes rêcompenses dé vouot' travas, et nouorrissez vouos ambitions. Séyiz contents - et mème ordgilleurs - dé la vocâtion tch'est vouot' gangne-pain. Quand mème qu' ou né s'sait p't êt' pon des pus fanmeuses ou distindgies, ou peut dév'nin eune vraie bénédiction dans ches temps changeants et încèrtains, et i' n'faut janmais oublier qu' ch'est la fîn tchi couronne l'oeuvre.
“Séyiz sus vouos gardes et mêfi'-ous en ch'tch'i' concèrne vouos transactions et entréprînses, car i' y'a un tas d'tritcheurs et d'malhonnêtes par les c'mîns. Mais i' n'faut pon oublier tch'i' y'a quand mème des braves gens tchi sont honnêtes et întégres et tchi peuvent vouos v'nîn en aigue en cas d'bésoin. Y'a acouo un tas d'héros dans l'monde.
“Séyiz pôsés et d'comport naturel. Ch'est pus aîsi d'êt' eune aut' pèrsonne, et i' n'faut pon oublier tch'i' y'a d'la bouânté dans l'monde tchi fait s'n appathence en temps et lieu quand nou crait qu' ch'est la mauvaîtchi tch'en gangne. Profitez d'l'exprérience dé la vie atchise par lé passage du temps, et n'vouos r'bînfrez pon contre l'arrivée d'la vieillèche, sachant tch'i' faut vivre vièrs ou mouothi jannes, mais laîssiz couorre - trantchil'ment, grâcieusement et sans rantcheune contre lé destîn - l's activités tch'appartchiennent à l'ênèrgie d'la jannèche. I' faut renforchi l'esprit par la priéthe et l'exèrcice spirituel qué la lectuthe et l'êtude des Saintes Êcrituthes vouos apportent, en fîn d'compte dé pouver lutter contre la probabilité êventuelle d'avâries et d'mînséthes tchelconques.
“I' n'faut pon vouos tracachi d'trop. Séyiz contents d'travailli honnêtement et sans pièrcheûser, et d'faithe vouot dévé 'dans l'état de vie auquel il a plu à Dieu de vous appeler', comme nouos l'dit l'Caticème dans la Litourgie d'l'Églyise, sachant qué si l'Bouân Dgieu soingne des flieurs et des bouais et d'toutes choses dans l'univèrs, I' souangn'na d'autant pus d'Ses êfants tch'I' l'aiment. Séyiz don en paix dans l'asseûthance dé S'n amour, un amour tchi dêpasse tout entendement, et en mème temps gardez vouot' esprit calme et un harmonie auve vouot' vaîsîn, car chutte tèrre est belle et av'nante et la vie vaut la peine de vivre dans l'bonheur du bein-être.”
Est-che qué v'la tchi né f'thait pon un bouan sèrmon à ch't heu comme in 1692? Malheutheusement, les gens sont pus en peine ches jours dé r'garder la télévision ou d's'en aller s'pronm'ner en moto qu' d'aller à l'églyise êcouter des sèrmons. I' faudra pourtant rêtabl'yi la crainte dé Dgieu et la bouanne condite tchi nouos est si bein apprînse dans l'Caticème pour nouos r'mett' solides sus nouos pids d'driéthe à seule fin d'marchi l'bouan c'mîn tchi mène au Paradis quand la Trompette sonn'na l'appel. Espéthons qué la Nouvelle Année, tchi n'est pon bein liain d'êt' auve nous, nouos apportétha chu bonheur-là.
George d'La Forge.
Viyiz étout: