Le Ménage ès Feuvres,
St. Ouën.
Lé 26 d'juilet, 1975.
Moussieu l'Rédacteu,
Tant pus qué l'temps va, tant pus d'troubl'ye, et tant pus d'troubl'ye tant pus d'abus. I' n'y a qu' à liéthe les rapports des séances dé la P'tite Cour pour vaie l'abus d'l'ûsage dé motos touos les jours et l'troubl'ye tch'en est l'rêsultat. Et hardi du troubl'ye est la cause dé l'abus d'la bouaisson et d'la vitesse - tchi m'vont pon ensembl'ye. Un vièr diton nouos dit: “Tant pus d'prêsse tant pus d'abus!” Quand tchi qu' les Connêtabl'yes s'en vont prendre sus ieux d'mett' des sîngnes dé réduction d'vitesse dans nouos p'tites rues d'campangne comme lé Connêtabl'ye d'St. Pièrre lé fit pour encouothagi la seûtheté d'la travèrsée du carrefour près d'l'églyise dé sa pâraisse?
Et quand tchi qu' les gens tchi travaillent touos les jours dans l's offices et les boutiques en ville s'en vont lus contenter d'faithe sèrvi les beusses à la pliaiche dé y'aller en moto? Quand y'a nécessité nationale dé sauver la pêtrole, ch'est riditchule d'en brûler tant dans eune pétite île comme la nouotre pour aller et r'vénîn chînq ou siex milles, quand nou peut faithe sèrvi la beusse. Et si les gens allaient par la beusse touos les jours i' sauvethaient eune pétite forteune tchi veindrait c'mode dans lus vièrs jours.
“Véthe!”, un anmîn m'disait l'aut' jour, “mais il en couôte, pour aller par la beusse!”
“Sans doute,” j'lî dis, “il en couôte, mais pas la maintchi tant comme la pèrte d'întéthêt sus les sou tch'i' faut pour acater un moto, lé couôtement d'san maintchein avau l's années, l'asseûthance, la pétrole et l'stationnement en ville touos les jours.”
Quant à mé, quand j'sis dans la beusse et qué j'vai les motos en lîngne solide, patte à coue dans la route dé St. Aubîn, allant à la vitesse dé quatorze milles dans tchînze jours, châque motoriste forchi d'senti l'odeu du gaz empouaîsonneux du “tuyau d'échappage” du moto en d'vant d'li, et d'l'heunmer dans ses poumons, j'mé d'mande pèrsonne peut y trouver du pliaîsi. Et ch'n'est non ravissant tch'i' y'a tant d'mauvais ma des poumons, car ch'là et la feunm'thie en sont hardi la cause.
Et y'a les taxes qué l'contribuabl'ye paie pour bâti des grand' babaines dé garages pour stationnement, comme lé chein dans Lé C'mîn d'la Cauchie, souos l'Mont d'la Ville, tchi n'pathaît pon êt' bein populaithe.
L'abus du pouvé par les syndicats troubl'ye la vie conmèrciale dé l'île, la libèrté d'l'îndividu, et souvent la fournituthe des vivre du peupl'ye.
Enfîn comme nouos l'dit un aut' diton: “Y'a pus d'un temps dans la vie!” Et les temps ont changi tant dépis qué j'tais mousse en Jèrri qué nou n'lé r'connaît pus. J'pense bein qu' ch'est ma connaîssance dé la vie trantchil'ye et paisibl'ye des vièrs temps tchi m'fait tréjous la r'gretter et enregistrer ma dêpliaîsance du tîntamarre dé la vie boulevèrsée d'à ch't heu, sa manque dé disciplinne et s'n'extravagance. Les vièrs ditons m'veinnent tréjous à l'idée. Y'en a iun tchi nouos dit: “Faut mangi à sa faim, mais n'faut pon êt' extravagant!” Quand nou-s-y pense, fallait-i' qu'les anciens eûssent eune mangnifique connaîssance dé la vie pour les înventer si à propos, les ditons.
Heutheusement, ouaithe tch'i' y'a du troubl'ye et d'l'abus, y'a acouo d's hommes întègres et solides dans l'monde et dans l'Île étout, et l'întégrité n'est pon d'tchi qu' nou peut acater. J'sis bein content d'vaie tch'i' y'en a dans L's Êtats tch'ont, à la fîn, attithé l'attention des Membres au fait tch'i' faut aller pus douochement, tchestchion d'dêpenses. Nou mé d'mande souvent tch'est qué j'crai du Président Ford des Êtats-Unis d'Améthique. Eh bein, né v'la un moussieu tch'a la réputâtion d'êt' un homme întègre. À cause dé ch'la l's Améthitchains en général ont confiance en li. V'la tchi n'empêche pon, sans doute, qué les “Démocrates”, tchi sont du parti travailliste, f'thont d'lus mus pour lé mett' à la porte quand veindra l'temps d'la préchaine êlection pour Président, viyant tch'il est “Républicain” - tchi veurt dithe consèrvateur. Telle est la politique! Quand il' 'tait dans la “House of Representatives” (la Chambre des Communes du Congrès Améthitchain) il 'tait iun du bein p'tit nombre d'politiciens tch'avaient l'respé et la confiance des deux partis politiques du Congrès. Mais, pour mentionner acouo un aut' diton, i' faut dithe qu' en Améthique comme en Jèrri: “Tchi sèrt lé publyi sèrt un îngrat!”
Mais, pour èrvénîn en Jèrri, j'fis, auve les membres dé L'Assembliée d'Jèrriais, eune touannée des belles pétites rues d'l'ile en char-à-banc l'aut' arlévée. Lé temps 'tait supèrbe et la campangne mangnifique, et les p'tites rues, souvent auve les bouais formant votte en d'ssus auve lé solé r'lisant l'travèrs dé lus fieillage, 'taient si belles qué v'la tchi m'faisait êt' ordgilleux d'la bieauté dé m'n Île natale. Espéthons qué la vigilance du Conmité pour la Consérvátion des Bieautés Naturelles s'en va empêchi l'bâtissage dé maisons tchi pouorraient avraûner la campangne pus qu' ou n'l'est dêjà.
George d'La Forge
Viyiz étout: