|
Air: Eveleen's Bower
Vrainment tu-es si jolie
Que tu-airais fait envie
Au pus grand roué que la terre ait jamais portè;
Et li qu'était si sage,
Airait bein, je le gage,
San sceptre et sa couronne à tes pids déposè.
Êcoute, ma Marie,
Ne sais pon si marrie,
Tu devrais bein pus tot en aver du pllaisi:
Quand nou t'vait si avnante,
Si fraiche, si tentante,
I faudrait être d'bouais pour pouver te laissi.
Assa donc, ma cherie,
Ne fais pon tant la vie,
Voudrais tu faire acrere que tu-as ieu du ma?
Comme est que tu de rdreche,
As-tu perdu la pieche,
Tu devrais pus tot rire et trouver bon d'chonna.
Ch'n'est pas une nouvelle trique
Qui drainement s'pratique,
La mode en a durè depis bein des mille ans
Tant qu'il y-aira une rose
Che s'ra la même chose
Vla qui continueura jusqu'à la fin des temps.
Allons donc, je t'en prie,
Ne sais pon si marrie
Tu l'sais bein j'n'en vais pas d'autre itelle en Jerri;
Ah! ch'est pour faire la minne,
Car tu ris, ma malinne,
En vla ocouo un autre afin de te punir.
P.L.
2/4/1872
|
