Les cheins tch'ont vîsité BBC Radio Jèrri dans la Rue d'la Pathade à St. Hélyi ont p't-êt' èrmèrtchi l'nom d'la maîson vaîsinne - ch'est Diwali House. Y'en a sans doute tch'ont d'vinné qu'ch'est un nom Îndgien, tout coumme les noms Almorah, Mashobra et Poonah tchi sont eune partie d'not' héthitage împérial en Jèrri.
Ch'est en tchi Diwali est eune fête pouor les Hîndous et les Sikhs étout - ch'est la fête des leunmiéthes. Lé mot diwali veurt dithe "eune rangie d'leunmiéthes" en Sanskrit et traditionnellement les Hîndous soulaient alleunmer des "diyas" tchi sont eune manniéthe dé crâsset. S'lon la couôteunme, chenna fut fait pouor la preunmié fais à seule fîn d'êcliaithi lé c'mîn du Seigneu Rama auprès qu'il avait tué l'dêmon Ravana. Nou dit étout qu'les veues alleunmées ès f'nêt's învitent Lakchmi, la déêsse des richesses, siez les fanmil'yes.
Pouor les Sikhs, la fête mèrque la libéthâtion d'prison d'lus siêxième goûrou en mil siêx chents vîngt quand lus Templ'ye d'Or à Amritsar fut êcliaithi. Mais les Sikhs avaient dêjà mèrtchi la fête, car lus Templ'ye fut fondé à Diwali en mil chîn chents septante-sept.
Dans l'Nord d'l'Înde Diwali est lus Nouvel An étout, mais dans l'Sud i' mèrquent lé Jour dé l'An s'lon un difféthent almonnas. La date dé Diwali est caltchulée s'lon la leune, et en deux mille chînq les cheins tchi mèrquent chutte fête lus en vont alleunmer lus veues, êlectriques ou traditionnelles, lé preunmyi d'Novembre.
Ch'est eune saîson d'présents et d'chucrîns et pouor souhaiter la prospéthité, et jé souhaitons don un bouôn Diwali à touos nos anmîns et vaîsîns tchi mèrquent chutte fête en Jèrri.
Viyiz étout: