Les Pages Jèrriaises

Lé dèrviche sus la bliête


Coumme un dèrviche ieauseux à danser sus la bliête,
Lé tournitchet à arrôser baptîse l'Êté.
Et s'i' fait acouo fraid et mouoilli dans nos têtes,
L'Hivé est hors! Lé tournitchet danse en dgaîté.

À la préchaine, les scouâles! À bi, les blianches gelées!
Et ch't êpeûthas châque ses bras dg'ieau pouor applaudi
La bourdonn'nie dé la faûcheuse tch'est à trînmer
La bliête - eune grande grève dé vèrduthe ensolilyie.

Eune mathée d'myi nos radouochit. L'Hivé est hors,
Et les jets dg'ieau sont à valser en douoche touothâle.
Lé tournitchet arrôse chutte bliête d'Êté tchi bouort....
À bi, les blianches gelées! À la préchaine, les scouâles!


Geraint Jennings
Avri 2002


 

Viyiz étout:

 

Les Pages Jèrriaises