.
Les cheins tchi viyaient la dgaîngue “La Sagesse Nouormande” à jouer lus chifournies en Ville duthant La Fête Nouormande l'année pâssée, éthaient ieu l'pliaîsi d'ouï chu vièr înstrument ravigoté. Né v'chîn l'Sieur Roland Scales dé chutte dgaîngue-là tchi nos explyique l'histouaithe d'la chifournie:
 Lé Sieur Scales peut tréjous attriotchi les belles femmes auve sa chifournie! La Fête Nouormande 2002 à St. Hélyi
|
Aut'fais les Jèrriais et les Dgèrnésiais s'abusaient à chanter et à danser au son d' la chifournie. Mais tch'est qu'est ch't înstrument? Feu l' Docteu L' Maistre la dêcrivit comme eune espèce dé violon. Oulle a eune mannivelle à touônner et un cliavé. Ou bouordonne comme eune pouque à vent. Ou stridule comme un critchet.
Dévrai oulle est hardi vielle. I' y'a eune stchulptuthe du douzième siècl'ye d'un înstrument semblabl'ye - l'organistrum - à la cathédrale d' St. Jacques d' Compostelle. Au Mouoyen Âge la chifournie s'êtendait sus presque toute l'Ûrope, dé l'Espangne jusqu'à la Russie. L'înstrument s'ouïyait ès cours des rouais comme dans les rues.
Au seizième siècl'ye ou tchit hors d'usage dans la bouonne sociêté. Ou d'vînt un înstrument d'bédgeux, mais ou r'gângnit sa vidgeu au dgiêx-huitième siècl'ye. Des belles chifournies pouor l's aristocrates èrfûtent faites, et Vivaldi, Corrette et Chédeville fîtent des compositions. La faîchon pâssit au temps d'la Révolution Française, mais ou sûrvêtchut jusqu'au vîngtchième siècl'ye comme înstrument paysan. Edith Carey nos dit qu'la chifournie dispathut d'Dgèrnésy au dgièx-neuvième siècl'ye; s'lon Fraînque L' Maistre ou dispathut dé Jèrri d'vièrs 1914. Les dreins sounneurs traditionnels d'chifournie en Basse Nouormandie mouothîtent avant la dreine dgèrre.
Ach'teu i' y'a pus d' trente faîseurs d' chifournie en Ûrope et l'înstrument est acouo pus populaithe qu' janmais. Nou l' trouve même dans la musique modèrne - par exempl'ye, la dgaîngue d' Robert Plant et Jimmy Page.
L'histouaithe d' la chifournie ès Îles d' la Manche est mystéthieuse. I' y'a tréjous plusieurs réféthences littéthaithes du temps pâssé, don j'savons bein qu' l'înstrument s'trouvait ichîn. Jé n'savons pus tchi qu' i' taient les sounneurs d'Jèrri, et la musique tch'i' jouaient est un bouôn sujet pouor la spétchulâtion. L' Docteu L' Maistre fît des r'chèrches y'a tchiques années mais i' n'put pon trouver eune chifournie tchi restait en Jèrri, mais p't-êt' bein qu'i y'a un înstrument ou même un vièr portrait muchi et oublié dans tchique solyi ou galetas.
Roland Scales
Viyiz étout: