Quand j'tais mousse, en allant à la grève à l' Ouaisné, y'avait eune p'tite sente qu' j' faîsais sèrvi souvent à la pliaiche d'marchi ava la route pour êviter d'être êcrasé par les char-à-bancs. Au bord d'la sente y'avait – et p't-être qu' y'en a acouo – des vielles caravannes; tchiques-eunes en d'lacres, d'aut's si bein muchies qu' nous éthait dit qu' i' taient pustôt des p'tites caûminnes qu'des caravannes. Dans chu temps-là, les caravannes n'taient pon allouées sus les routes dé l'Île, et un tas d'ches vielles-là avaient 'té înmportées d'vant la dgèrre.
Ach'teu qu'les caravannes sont pèrmînses d' visiter Jèrri, y'a des gens tchi vont profiter d'eune vacance dans lus caravannes. Quand ches'-chîn arrivent par baté, i' sont escortées ès camp'thies, et i' restent là pour eune sémaine ou deux tandi qu'lus aûgnièrs font sèrvi lus vaituthes pouor aller ès difféthentes parties dé l'île. Y'en a tch' amènent des bikes et lus tchians étout, et ch'est justément comme s'il' ont lus siez-ieux en Jèrri.
Ma belle-soeu et s'n homme sont parmi les gens tch'aiment bein faithe des vacances en caravanne, et l'aut' jour ou nos racontit eune histouaithe qu'oulle avait ouï à iun d'lus assembliées d' caravannes. Mais est-che vrai? Ch'est à vous d'en jugi!
Y'avait un homme et sa femme qui fîtent la caravann'nie, et i' taient en route à eune camp'thie d' caravannes. La femme 'tait hardi lâssée, et ou restait à dormi dans lus caravanne tandi qu' s'n homme cachait la vaituthe. Un mio pus tard, l'homme s'arrêtit dans un êcart au bord d'la route pour faithe ses bésoins driéthe l'fôssé. Sa femme s'rêvîlyit, et oulle en avait bésoin étout, mais ou s'trouvit driéthe un aut' fôssé. Quand l'homme èrvînt dans la vaituthe, i' n' réalisit pon qu'ou n'tait pus dans la caravanne et i' r'broussit c'mîn. La femme, dans sa c'mînsole, rêussit à arrêter un cacheux d' motor-bike tchi pâssait, et auprès tchiques minnutes les v'là à rattraper la vaituthe et la caravanne. Mais l'homme tchi cachait 'tait si surprîns quand i' la dgettit habilyie en c'mînsole sus l' driéthe d'la motor-bike, qu'il oublyit dé r'garder la route et ieu eune collision!
Tony Scott Warren
Viyiz étout: