La cause qui vint d'vant la Cour l'aut'e jour quand treis pêtcheurs furent condamnés pour avé 'té haller au dranet dans la baie d'Grouville a montré au pouore Caouain les risques qu'il a couothu toutes ches années ilo en allant à la pêque la nièt.
J'avais tréjous ouï, mé que les Inspecteurs portaient châtchun lus revolveur dans lus pouchette, mais je n'le criyais pas. Mais i' fallait que ch'fusse vrai tout d'même puisque l'sien à Tom Le Scêlleux explôdi au moment qu'i' happi ches treis hommes-là.
Tom dit au Juge qu'i' n'pens'sait jamais de d'valler dans les grèves la nièt sans être armé pour sa propre protection, et je n'sais pas si nou peut justement l'bliâmer.
I' va tchiqufais des gens ramasser du paisson illégalement, qui n'voudraient pas y être attrapés sus autchun compte et nou n'peut jamais saver tchil extrême qu'ils îthaient pour êviter d'être exposés, si les Inspecteurs lus tchiyaient sus l'co.
Un homme tout seu, malgré qu'il ait la louai d'san côté, ne peut pas faithe grand'chose contre une djaîngue d'hommes dêterminés de n'pas lus laissi attraper, et l'Caouain li-même a ouï un homme se vanter que jamais i'n'allait avec ses gens à la pêque sans emporter une pelle avec ieux pour faithe un creux dans l'sablion en cas d'besoin.
Dans ches conditions-là, rain d'pus naturel que les garde-pêques prennent lus précautions, et le p'tit incident d'l'aut'e nièt aitha p't'-être un êffet salutaithe sus bain d'autres qui cherchent à s'motchi d'la Louai sus les Pêquethies.
D'un autre côté i' y en a qui veulent dithe que Tom et Ph'lip portaient ches armes-là avec l'unique intentien de tither l'Caouain si jamais i' l'trouvaient dans les grèves ou dans les rotchers.
Pas qu'ils en ont contre li personnellement, bain au contraithe, j'avons tréjous 'té grands amins.
Mais, comme fonctionnaithes publics, en supprimant l'Caouain, ils aithaient dêfait l'île, une feis pour toutes, d'une niaîsance publique.
I'y ont-i' êprouvé? Je n'le sais pas.
J'ai passé bain des nyits dans les grèves à êprouver à happer du lanchon, j'ai ramassé des vlicots et des baînis, j'ai tchiquefois rapporté à Marie Hibou des p'tits homards qui n'taient pas de m'suthe, mais jamais les Inspecteurs ne m'ont disteurbé.
Heutheusement pour mé peut être, je n'les ai jamais rencontrés.
I' peut y aver ieu des occasions iou qu'ils ont creu avé rêussi de m'fussillyi, car de temps en temps i'y a ieu une malheutheuse mauve de trouvée morte au pliain, mais jusqu'acheteu tréjous, la Caouain en a rêcappé.
Le Caouain offre ses pus profondes sympathies au Sieur Ozouf d'aver ieu san dranet confistchi et d'aver ieu à payi une amende. En même temps je l'felicite d'en aver rêcappé si bain d'aver 'té tithe et je m'félicite ettou, car la balle qu'êcorchi la gambe au Sieur Ozouf aithait peu, tôt ou tard, rompre iune de mes ailes ou m'faithe un creux dans l'estoma.
Caouain
1924
Viyiz étout: