Les Pages Jèrriaises

Il y en a qui s'font que Marie Hibou n'sait pon la maintchi

Il y en a qui s'font que Marie Hibou n'sait pon la maintchi de chein qui s'passe et qui devrait être mins sus la gazette pouor lus plus grand plaisi et faithe des autres une riselée.

Bé seur, j'n'sais pon touot mais y faut dithe èttout que j'n veur pon mettre dans la gazette la maintchi de chein que j'sais car oprès touot y faut saver taithe sa becque pouor n'pon étibotchi l'pithèt.

Touot mes d'vis ch'est pouor aver un miot d'fun et les siens qui sont court de pé et se trouvent pitchis n'ont qu'à lus frotter car quant à mé j'n'leur veur pon de mâ en touot et j'accepte couomme un biau présent touos lus compliements même lus souhaits d'aller m'cauffer iou qui n'manque pon de tcherbon et iou que les stockers n'sont jamais en strike et iou qu'p'être j'aurais l'plaisi de rencontrer tchiques uns d'ieux.

J'connais un grand homme dans un p'tite paraisse qui fut bien surprins il y a tchique semaines car y criait d'avé d's'oeufs au feu et y n'y avait que d's'escalles mais n'v'la qui ly sert bein car chu Moussieu aurait dû aver pus d'avis que d'faithe couomme il le fit d'vant l'jour qui ly douonnait l'drait de saver à tchi s'en t'nir.

Chut grand homme est bein connu en Jerri mais pouor vos en dithe d'avantage j'aimerais mus être tithée. A buan entendeur, salut.

* * *

Dans une autre paraisse, nou voudrait bein qu'ieun des siens en poste aille vais son médecin pouor obtenir un certificate de maladie de tchoeur ou de tchi dithèt qu'nous n'peur pon vais, car nous est d'avis qu'il a une maladie et qui d'vrait abandonner la poste.

Chunna fait mâ au tchoeur à chut homme qui compte être sain de corps et d'esprit et n'vais pon pouortchi qu'il irait dépenser des sous pouor vais un docteu.

Si l's'autres n'sont pon d's'n'avis ch'est qu'il y a tchique temps chut homme était malade d'une maladie que les docteurs n'connaissent pon mais que les siens d'Hill Street savent tchique fais guérir avec le temps!!

* * *

Nennin, j'n'vais pon vous raconter chein qui s'passi dans la paraisse au Captain qui n'a jamais été en mé, la séthèe qu'nou passi les comptes des Inspecteurs.

J'sais bein qu'au meeting qui y eut oprès, au British, l'John des Trais Bouais proposi quassiment toutes les santés et que nous passi une buanne séthèe.

J'oui Fred du Colombi chanter et ch'est qu'il a un belle vouaie ma fé mais chein que j'voudrais bein saver chest a tchi prumièthe niêt de ches neuches que l'affaithe arrivi d'même au p'tit Jack des Charriéres Nicolle, viyant que j'crais qu'il en a déjà ieu trais bordées d'même, chu pouore p'tit Jack, qui r'grettait bein que l'docteu n'tait pon là pouor ly frotter l'estoma viyant qu'il avait une suée d'fraid! J'm'd'mande èttout si chest que l'Philip de Millbrook raconte ses Tit Bits au Moussieu d'vant tchi j'espèthe n'jamais être présentée. P't'être que ch'est pouor chunna que chu Moussieu n'couommence jamais sa job d'vant dièz heuthes un quart ou pus.

J'espèthe qu'ieun des nouviaux inspecteurs n'f'ra pon couomme son prédecesseur qui envyi des cartes datées du huit Auguste pouor dire à certains de se trouver à la carrière le trais Auguste “pour fair une jour de chemin!”

Caouain
1924
 

Viyiz étout:

 

Les Pages Jèrriaises