Les Pages Jèrriaises

Dans la nièth de Lundi à Mardi

Dans la nièth de Lundi à Mardi, i' ventait si du' que j'criyais quâsiment que chutte dgales du Sud-seur-ouest éthait bétôt fait de poussé ma pouorre carcasse hors de Jerri, au pus grand pliaisi des siens qui trouvent que j'ai la bec trop longue. J'fut quâsiment niè' par unne louaîmme et comme j'nai ni galoches ni huilés, ch'est mes plieummes clieutées, que je reveint dans ma niche au haout du Vièr Marchi.

J'ai tèt dans la pâraisse de la rose et du louothi pour savé chein qui s'pâsse dans chutte pâraisse.

J'ai ouï que le gros Nickless, le routchi, a tait bein occhupé, i' y-a tchiques temps, pour savé les siens qu'avaient des tchans sièz y-ieux. chutte fais, i' n'y-avait pas couron ni de rouelles dans san pagas. Achteu, mé qu'est tchuthieux comme unne bellette, j'voudrais bein savé pourtchi que l'gross Nickless est en strike, bein saeux d'pis qui n'tait pas à raboté les routes comme d'amor, pourtchi qu'il allit dans bein des ménages de la pâraisse et a t'y trouvé des lévriers!

***


I' y y-a tchique temps j'vos dit que le m'en tais r'venu bein vite de la pâraisse à Dolly ayant ouï des bang! bang! d'unne arme, dans iun des clios qu p'tit Flip de la maison d'ardouaise, le sien qu'a mins de côté le miot d'serque, cause de tant d'histouèthes.

Savous pourtchi qui tithi s'n'arme, bouannes gens.

Eh bein! mé, j'm'en vais vos l'dithe. Le p'tit Flip avait lu la gâzette et quand il apprit qu'i y-avait un nouviau Gouverneux en Jerri, qu'il tait dans sa pâraisse et que nou n'avé pas ieu la civilité de tithé un salut du châté, i' s'fît: Mé, Flip, j'men vais lî tuthé un salut avec m'n'arme.

***


J'ai tèt occuo unne feîs dans la pâraisse de man biau cliochi. Pour saeux, i' faout que j'faitche bein attention à mé, car i' y-a des scotchmen et d'aourtres qui sont bein mârris à m'ègar'. Ma fé, j'en ai grand r'grèt, mais chouna ne me f'tha pas taithe ma bec, fouai de "Caouain".

Grattous, mes bouannes gens, grattous, si chein que j'dit vos pique un miot.

J'peux pas finit d'ècrithe sans d'adréchi daeux mots ès chanteurs et chant'resses du cantata. si peuvent pas avé la paix là qui pratique, j'sis saeux, avec la permission de pîteur, qui pouorraient l'faithe dans l'parlaeux, bein à l'abri, sans dispute. en cas que l'appartement s'rait pas assèz grande p't-être qui pourraient pâssé l'aoutre bord, dans l'appartement, ou-est qu'nou trouve unne belle perruque tchique fais.

Cahouain
La Chronique de Jersey 9/3/1912

 

Viyiz étout:

 

Les Pages Jèrriaises