|
Ou s'sez contents je sis bein seûx De oui man r'miède contre la peûx, Qu'j'ai dêcouvert dans un Almonas, Cou'ert de ponsi dans not' galetas. Pour les garçons ch'est bein aisi N'y a qu'a soufflyer à plien gôsi. Pour apprendre ès filles à soufflyer Je m'en vais des leçons donner. Ma mémée 'tait êpouvantée, S'y'avait eune souothie dans l'chanchais. Mais achteu qu'j'y'ai apprîns à soufflyer N'y a pon d'vèrminne pour l'êffriter. Combein dé fais tout seu au sé Je trembliotais de peûx au lièt, Souos les lincheurs presque êtouffé Je n'osais la tête dèshaller. Je vos en prie de faithe coumme mé Et bein haut vos mettre à soufflyer; Pour êffriter touos les rôdeurs Fantômes, r'venants et les voleurs! FMH Vèrsion modèrnîsée: Ou s'sez contents jé sis bein seux Dé ouï man r'miède contre la peux, Qu'j'ai dêcouvèrt dans un Almonnas, Couèrt dé ponsi dans not' gal'tas. Pour les garçons ch'est bein aîsi N'y a qu'à sûfflier à pliein gôsi. Pour apprendre ès fil'yes à sûfflier Jé m'en vais des léçons donner. Ma mémée 'tait êpouvantée, S'y'avait eune souothis dans l'châchais. Mais achteu qu'j'li'ai apprîns à sûfflier N'y'a pon d'vèrminne pour l'êffriter. Combein dé fais tout seu au sé Jé trembliotais dé peux au liet, Souos les lîncheurs presque êtouffé Jé n'ôsais la tête dêhaler. Jé vos en prie dé faithe coumme mé Et bein haut vos mettre à sûfflier; Pour êffriter touos les rôdeurs, Fantômes, r'vénants et les voleurs! |
Viyiz étout: