|
Y'a des pèrsonnes tchi pâssent lus vie entchiéthe En actions charitabl'yes pouor les coucous. Et y'a tchiqu's'eunes tch'ont l'ambition dé siéthe Des bliues lêzardes et les env'yer au zoo. Les cheins tch'êtudient lé “Roman de Rou” Pouor faithe des livres sus Wace et ses êcrits Ont fait raide bein pouor chu monde, véthe, pouor tous.... Mé, j'voudrais aver chîn chents millions d'louis. L'aventuthyi chèrche eune riche héthitchiéthe; Les hardelles veulent qu'nou lus baille des bijoux; Les bracheurs font lus forteune dans la biéthe, Et d's aut's l'ont fait bein au liain au Pérou En bâtissant auve lus martchieaux et clious. Un gângnant voudrait èrchéver san prix; Lé milsoutchi voudrait acouo quat' sou... Mé, j'voudrais aver chîn chents millions d'louis. Lé champangne vaut bein mus qu'l'ieau d'la riviéthe; Lé caviar vaut mus qu'les pais au fou; Lé pliastique né rempliaich'cha pon l'iviéthe; Et Vénise est pus belle qu'La Preunmié Tou. Coumme un panda pièrcheux dans lé bambou, Jé voudrais pâsser des journées d'laîsi. Les riches né font rein - j'en sis-t-i' jaloux! Mé, j'voudrais aver chîn chents millions d'louis. Bouonnes gens, les pauvres es'sont tréjous auve vous. Mais donnez-mé vos titchets dé lot'tie: Jé m'en vais gângni châque fais qué jé joue. Mé, j'voudrais aver chîn chents millions d'louis.
Geraint Jennings Novembre 2002
|
Viyiz étout: