J'avons ieu toute eune année d'êvénements.
La rêunnion du mais d'Octobre 2001 eût lieu à la Salle Parouaîssiale dé Saint Louothains. Les danmes du W.I. dé St. Ouën montîtent sus la strade pouor nos présenter lus chansons et r'citâtions.
Au mais d'Novembre, Les Séthées Jèrriaises d'l'Eisteddfod fûtent un grand succès. Ch'est la preunmié fais d'pis bein d's années qu'i' y'a ieu bein pus d'mousses à y prendre part qué d'grandes gens. Les membres d'L'Assembliée tchi 'taient dans l'audienche ou sus la strade eûtent du fanne - mais j'espéthons vaie acouo des membres d'L'Assembliée sus la strade à liéthe tchiquechose à l'av'nîn. I' faut mouontrer ès mousses (et même à nos aut's) coumme tchi prononcer du bouôn Jèrriais.
Au mais d'Dézembre, des membres d' L'Assembliée auve un tas d'aut's gens, des mousses, et d's êtudgiants chantîtent des cantiques dé Noué dans la Rue d'Driéthe à seule fîn d'tcheûter des sou pouor les charités d'Noué - et pouor aver du fanne étout.
J'quémenchînmes auve les cantiques qu'les mousses avaient pratitchi dans lus clâsses: “Sonne les Clioches”, “Lé Fis d'Marie”, “Jé vai les Vailes dé trais batchieaux”, et “Lé housse et lé hierru”.
J'avêmes un boutchet pouor collecter les sou des pâssants, et les mousses prîntent des tours à châtchi l'boutchet pouor tcheûter.
Chu “tchoeu” n'avait pon pratitchi ensembl'ye et don y'avait pus d'enthousiasme qué d'talent - mais ch'tait juste pouor lé fanne. Et y'avait même pus d'fanne quand l'tchoeu c'menchi à chanter “Des bèrgers gardaient lus troupieaux” sus l'air dé “Qué Dgieu vos garde heutheurs, bouannes gens”! Et tchi pus est, chenna allait bein - trop bein en êffet!
Pis lé Sèrvice dé Noué eut lieu à l'églyise dé St. André à la Preunmié Tou, St. Hélyi. La congrégâtion fut composée d'un grand nombre dé membres et d'anmîns.
Les neu léçons fûtent liues par des membres d'l'Assembliée, et les cantiques fûtent chantés par l'tchoeu, l's êtudgiants, des mousses dé d'dans l's êcoles et la congrégâtion. Y'eut étout un supèrbe solo chanté par Madanme June Lé Rossîngno.
À la fîn du sèrvice la congrégâtion fut învitée d'pâsser dans la salle d'l'églyise pouor lé souper traditionnel.
Duthant l'souper, Papa Noué arrivit pouor vîsiter les membres d'l'Assembliée, mais la Belle Fée 'tait mains belle qué d'couôteunme. Lé manque dé bieauté siez la Belle Fée né sembliait pon, en tout cas, empêchi l'fanne pouor les membres. Mais séyiz asseûthés : ou n's'en va pon èrappathaître coumme chenna ch't'année.
Les mogues arrivîtent juste avant l'sèrvice et il' ont fait d'la bouonne publyicité pouor L'Assembliée duthant l'année. Y'en a acouo tchi restent - et s'ous êtes à pensez ès présents d'Noué, n'oubliez pon des mogues pouor vos anmîns, vos fanmîl'yes ou même pouor vos piéthe enn'mîns. J'voulons les vendre!
Au mais d'Janvyi des membres d'L'Assembliée lus rêunnîtent à la Salle Parouaîssiale dé St. Jean pouor un discours prononcé par Madanme Mary Philips.
Madanme Philips adréchit les membres sus l'histouaithe des réformes des Êtats.
Oulle explyitchit coumme tchi qu'la Code des Louais dé 1771 fut faite, qu'les Députés, quatorze en nombre, fûtent ajouôtés en 1856, et qu'auprès la Libéthâtion l'drouait d'vote fut donné à touos les Jèrriais et Jèrriaises âgis d'pus d'21 ans.
Tout chennechîn fut bein explyitchi - auve un tas dé p'tites histouaithes et commentaithes amusants - par Madanme Philips.
Au mais d'Févri y'eût eune séthée d'Bîngo à la salle Pârouaîssiale d'La Trinn'té.
Et au mais d'Mar l'Dînner eût lieu à L'Hôtel Ambassadeur.
Au mais d'Avri des membres lus rêunnîtent à l'Églyise Pârouaîssiale d'La Trinneté Dînmanche lé 28 d'Avri pouor lé Sèrvice Annuel.
I' n'y'avait pon d'rêunnion au mais d'Mai pa'ce qué la Fête Nouormande vînt siez nous au c'menchement d'Juîn. Y'a deux années nos vaîsîns en Dgèrnésy organnîsîtent eune divèrsément bouonne fête et l'année pâssée j'nos en fûmes à Coutanches pouor eune fête organnîsée par nos couôsîns d'la Grand' Tèrre.
Nou peut dithe qu'not' Fête 'tait la pus grande et la miyeuthe. Ou c'menchit auve d'la chant'tie d'Beatles pouor BBC Music Live.
Y'avait d'la beusquéthie duthant la s'maine, même des Angliais tchi chantaient en Jèrriais - ou savez bein qué l'Jèrriais, ch'est eune langue întèrnâtionale!
Les Chantous de la Côte auve lus costumes, lus danses et lus chansons d'la Grand' Tèrre - et nos vaîsîns Dgèrnésiais arrivîtent avant l'grand weekend pouor danser dans les rues d'St. Hélyi.
Y'eût eune pathade en ville auve les participants d'la Fête dans lus costumes et auve lus couleurs tchi finnit à la Salle Pârouaîssiale où'est qu'j'feunmes atchilyis pouor un vîn d'hounneu.
Toute la journée Sanm'di y'avait eune fête au Mangni d'Sanmathès - auve d's èrcitâtions et chansons en Jèrriais, en Dgèrnésiais et en Nouormand dans la grand' tente; et d'la dans'sie et mûsique dans l'bel du mangni.
Au sé, y'étha lé concèrt par Magène, la dgaîngue Nouormande, tchi fut sponsorîsé par L'Assembliée.
Malheutheusement i'tchiyait d'la plyie Dînmanche et l'match dé choule à la crosse au Victoria Park fut abandonné auprès tchique minnutes.
Et pouor finni la Fête y'eût un sèrvice en Jèrriais à la Chapelle Philadelphie à St. Pièrre à 6.30 du sé. Lé Pâsteur Brian Vibèrt donnit un raide bouôn sèrmon.
L'année tchi veint, nos couôsîns Dgèrnésiais lus en vont atchilyi la Fête au mais d'Mai. Les membres tchi voudraient y prendre part sont învités d'contacter lé Conmité Exetchutif.
Un tas d'membres et d'anmîns lus rêunnîtent pouor la Touônnée en Lorries au mais d'Juîn. Coumme d'amors, y'avait du fanne à cachi par les c'mîns et à vîsiter d'difféthents endraits dans l'Île.
La touônnée pâssit par les Mangnièrs dé St. Ouën et d'La Trinneté, et les membres prîntent du thée au Living Legend.
Au mais d'Juilet, y'eût un r'pas à la broche à la Trinn'té.
Au mais d'Août quatorze membres allîtent en Dgèrnésy pouor eune mangnifique journée. I' vîsitîtent la tapiss'sie d'Dgèrnésy et fîtent eune touônnée dé l'Île.
Viyiz étout: