Nouvieaux Comités.

Les membres suivants fûtent êlus ès nouvieaux comités:- Comité Dramatique: Mmes Marie Trachy, Amelia L. Perchard et Eileen Le Sueur, Mlle Emma Syvret, Florence M. Hacquoil et Emily Blampied, et Me. Du Tot. Comité d'Rédaction et Publ'yications:- Mme Kathleen Le Maistre, Mlle Florence M. Hacquoil et Mêssieux Frank Le Maistre, George W. Bertram et G. F. Le Feuvre. Comité Philologique:- Mêssieux Philip Ahier, B. ès Sc., et Frank Le Maistre, et Mlle F. M. Hacquoil. Comité Social:- Mmes Lilian A. Benest et F. Perrier, Mlles May Orange et Kathleen M. Le Boutillier, et Mêssieux Thomas A. Moignard, John Wesley Le Breton, George Le Couteur et Frank Trachy.

Chaque Comité est autorisé d'ajouoter à san nombre, et touos les Comités respectifs sont enchèrgis d'chouaisi un Président et un Ségrétaithe.

Nouvieaux Membres.

Les nouvieaux membres êlus à chutte rêunion sont:- Lé Juge Stanley Hocquard et Mlle Elsie Hocquard, le Chant'nyi Reg. Mourant et sa danme, Mme Georgina Mourant, Me. Charles Philip Billot et sa danme, Mme Lilian Maud Billot, Mme Eva Gaudin, et Mêssieux Albert Messervy, M.R.C.V.S., Clifford Pallot et John George Pallot.

Don de Mlle E. M. Renouard.

Le Président annoncit ès membres qué Mlle E. M. Nurse Renouard avait fait présent à l'Assembliée de deux bieaux livres pour la bibl'yiothèque, et un magnifique portrait du Vièr Châté à Gouorré, dessinné à l'occasion d'la visite dé la Reine Victoria au Châté. Un vote d'ermèrcyîments fut accordé à l'unanimité à Mlle Renouard pour sa bouonté à l'êgard dé l'Assembliée.

Décès du Chant'nyi Le Rossignol.

Moussieu Edwards fît allusion à la pèrte qué l'Assembliée a subi par l'èrgretté décès du Chant'nyi F. G. Le Rossignol, dé St. Brélade. Lé Chant'nyi 'tait un bouan vièr type du Jêrriais av'nant et solide du temps passé. Il' tait hardi intérêssi dans la consêrvation d'not' vieille langue, et i' fut iun des preunmièrs à s'associer à l'Assembliée.

Chanson Jêrriaise.

A la fin des travaux d'la rêunion, lé Président annoncit qué Mme Reg Rénault, avait 'té charmante assez dé v'nîn nouos chanter tchiquechose en Jêrriais. Mme Rénault pathut sus la scène habilyie en bouonnefemme du temps passé, auve eune capote, un brun châle, un blianc d'vanté et un rouoge mouochet. Auve un air conv'nabl'yément triste, ou' nouos chantit: Man bouon'homme est bein malade! Ou' chantit divèrsément bein ouiathe qu'ou' n'avait pas ieu l'temps d'dênichi un accompangneux, et ou' fut appliaudie d'bouan tchoeu par touos les membres. En l'a r'mèrciant, lé Président Edwards lî dît qu'oulle avait du couothage pour chanter sans accompangneux!

La Libéthation en Lantèrne Magique.

Pour finni eune bouanne séthée, lé Trésoryi George W. Bertram dêhallit sa fanmeuse lantèrne magique et nouos montrit un film dé la libéthation d'l'île lé 9 dé Mai 1945. Les veues 'taient divèrsément bein prînses, et tout l'monde 'taient hardi întérêssis d'èrvaie des scènes si historiques. V'la tchi lus rapplit la mînséthe des jours d'otchupation et la jouaie dé lus r'trouver, Dgieu mèrci, Jêrriais libres auprés chînq ans souos la domînation allemande! En r'mèrciant Moussieu Bertram, lé Président èrmèrtchit qué ches veues-là valaient la peine d'êt' consèrvées à janmais.

Préchaines Réunions.

Dévant ajourner la rêunion, lé Président annoncit qué la rêunion mensuelle dé Novembre étha lieu Vendrédi, lé 28 dé Novembre 1952, et attithit l'attention des membres au fait qué la rêunion mensuelle du mais d'Décembre es'sa avanchie à cause des fêtes dé Noué, et qu'oulle étha lieu Vendrédi, lé 19 dé Décembre 1952.
 

Viyiz étout:

• L'Assembliée d'Jèrriais