Lé Preunmié Livre des Chroniques
Chapitre 5, vèrset 21
Et il' en prîndrent lus bestchias: chînquante mille chanmeaux, deux chents chînquante mille brébis, et deux mille ânes, et chent mille hoummes.
Chapitre 11, vèrsets 1-9
Épis tout Israël s'rassemblyit siez Dâvi à Hébron et dit, "Véthe, j'sommes tén os et ta chai. Au temps pâssé, quand Saûl 'tait l'rouai, ch'tait té tchi m'nait Israël quand i' lus dêhalaient ou rentraient; et l'Seigneu tan Dgieu té dit, 'Tu s'sas l'gardeux d'brébis, d'man peupl'ye Israël, et lus gouvèrneux'." Touos les vièrs d'Israël vîndrent don siez l'rouai à Hébron et Dâvi fit eune alliance auve ieux à Hébron l'avant au Seigneu, et il' onguennîdrent Dâvi et l'fit rouai sus Israël, coumme lé Seigneu avait dit par Samuel. Épis Dâvi et tout Israël lus en fûdrent à Jéthusalem (tch'est Jébus) et les Jébusiens, l's habitants du pays, 'taient là. Et les gens d'Jébus dîdrent à Dâvi, "Tu n'entréthas pon par ichîn!"
Tout coumme, Dâvi gaffit l'fort d'Sion, tch'est la ville dé Dâvi. Et Dâvi dit, "L'preunmyi tchi bâdra eune slîndgeûthe contre les Jébusiens s'sa l'chef et l'cap'taine!" Et Joab fis Zéruia montit l'preunmyi et d'vînt chef. Et Dâvi gaffit la tou pouor sa d'meuthe, v'là tch'est coumme tchi oulle a nom la ville dé Dâvi. Et il entanmit la bâtithie d'la ville tout l'tou, à c'menchi d'Millo, et Joab arreunit l'restant d'la ville. Et Dâvi d'vînt d'abouan pus piêssant, viyant qu'lé Seigneu d's armées 'tait acanté li.
Chapitre 11, vèrsets 17-19
Et Dâvi en eut grand affit et dit, "J'voudrais bein qu'nou m'donne à baithe dé ieau d'la fontaine dé Béthléhem du bord d'la porte d'la ville!"
Épis l'Trio fîdrent eune brècque dans l'armée des Philistîns et puchîdrent dé l'ieau d'la fontaine dé Béthléhem tch'est du bord d'la porte d'la ville et en remportîdrent à Dâvi. Mais Dâvi r'nonchit à en baithe et l'a vèrsit au Seigneu, et dit, "Man Dgieu, qué jé n'faiche pon d'ité! Coumme tchi qué j'baithais l'sang d'ches hoummes-chîn tch'ont ristchi lus vie pouor mé?" Et i' n'en but pon don. Ch'tait l'Trio d'dgèrrièrs tchi fîdrent ches choses-chîn.
Chapitre 14, vèrset 1
Et Hiram, l'rouai d'Tythe, env'yit d's hoummes à Dâvi auve du bouais d'cèdre, et des machons et des tchèrpentchièrs pouor la bâtithie d'sa maîson.
Chapitre 14, vèrsets 3-7
Et quandi qu'i' d'meuthait à Jéthusalem, Dâvi s'mathyit auve acouo des femmes et nouôrrit acouo des fis et des fil'yes - et né v'chîn les noms des mousses qu'il eut à Jéthusalem: Sammuah, Sobab, Nathan, Salomon, Ibhar, Élichuah, Elpélet, Nogah, Népheg, Japhiah, Élichamah, Béeliada, et Éliphelet.
Chapitre 17, vèrset 4
Va dithe à Davî man sèrveux, 'L'Seigneu dit, "Tu n'dai pon m'graie eune maiethon pouor y d'meuther d'dans".'
Chapitre 19, vèrsets 4-5
Hanun don blioutchit les sèrvants d'Dâvi et les fit râser et fit raccourchi lus cotelles pouor en mouontrer l'tchu et l's env'yit s'tchi, et d'même i' lus en fûdrent. Quand nou rapportit à Dâvi chein qu'ses hoummes eûdrent à suffâtchi, i' lus env'yit des m'sagièrs car il' en 'taient d'sahontés. Et l'rouai dit, "D'meuthez à Jérico entré-chîn qu'vos barbes èrcraîssent, épis r'vénez."
Chapitre 28, vèrset 8
Gardez auve soin les c'mandements dé l'Etèrnel vot' Bouon Dgieu
Viyiz étout: