Lé Preunmié Livre des Chroniques, Chapitre 29
Vèrsets 1-5
L'Rouai Dâvi dit à toute l'assembliée, "Man fis Salomon, l'chein chouaîsi par l'Bouôn Dgieu, est janne et manque d'expéthience, et la tâche est grande, car l'templ'ye n'es'sa pon pouor les mortels mais pouor l'Bouôn Dgieu. J'ai offèrt don à la d'meuthe dé man Dgieu, autant qu'j'en piêsse, l'or pouor chein tch'est en or, l'argent pouor chein tch'est en argent, et l'bronze pouor chein tch'est en bronze, lé fé pouor chein tch'est en fé, et l'bouais pouor chein tch'est en bouais, épis un amas d'onyx et d'pièrres pouor encâsser, d'antimouaine, pièrres dé couleu, toutes les manniéthes dé pièrres précieuses et d'la marbe en as-tu en veurs-tu. Épis par d'ssus tout chein qu'j'ai offèrt à la maîson dé Dgieu, j'ai man trêsor d'or et d'argent, et rapport à man dêvouement à la maîson d'man Dgieu j'l'offre à la maîson d'man Dgieu: trais mille talents d'or, d'l'or d'Ophir, et sept mille talents d'argent raffinné pouor la brâssel'lie des muthâles d'la maîson, et pouor tout l'travas qu'les hommes dé mêtchi éthont à faithe, d'l'or pouor chein tch'est en or et d'l'argent pouor chein tch'est en argent. Tchi qui s'en va don offri d'san bouôn tchoeu et s'consâcrer aniet au Seigneu?"
Vèrsets 9-15
Épis l'peupl'ye lus rêjouaissaient rapport qu'il' avaient bailli tout chennechîn d'lus bouôn gré pouor offri, touos unnis, librément au seigneu. L'Rouai Dâvi fut divèrsément rêjoui, li étout.
Et don Dâvi louangit l'Seigneu l'avant à toute l'assembliée: Dâvi dit, "Qu'lé Seigneu sait louangi, not' péthe lé Dgieu d'Israël, jusqu'ès âges. À té, oh Seigneu, est la grandeu, et l'pouvé, et la glouaithe, et la victouaithe, et la majesté; car tout chein tch'i' y'a ès cieux et sus la tèrre est à té; à té est l'règne, oh Seigneu, tu'es haûchi pus haut qu'tout. Ch'est d'té qu'i' veinnent, les richesses et l'honneu et tu règne sus tout. Ta pouongnie est d'la forche et d'la piêssance, et atout ta main tu renforchéthas et agrandithas tout. Et achteu, oh not' Dgieu, j't'èrmèrcions et louangeons tan nom glorieux. Tchi qu'est j'sis, mé, et tchi qu'i' sont man peupl'ye tchi pouôrrêmes t'offri chennechîn dé not' bouôn gré? Tout veint dé té, ch'est l'tchein qué j't'offrons. L'avant à té j'sommes raîque des horsains et des vîsiteurs, coumme touos nos anchêtres; nos jours sus la tèrre pâssent coumme l'ombre, et n'y'a pon d'espé.
Vèrsets 26-30
Dâvi fis Isaï régnit ainchîn sus tout Israël duthant un règne dé quarante ans: i' régnit sept ans à Hébron et trente-trais ans à Jéthusalem. I' mouothit d'un bein bel âge, auprès un règne à londgeu d'jours remplyis d'richesses et d'glouaithe. Et Salomon san fis régnit à sa pliaiche. Touos les faits du Rouai Dâvi, d'a à z, sont êcrits dans les patholes du d'vîn Samuel et les patholes du prophète Nathan et les patholes du d'vîn Gad, et chenna auve tout entouor san règne et san pouvé et chein tchi s'adonnit duthant san temps, en Israël et dans les rouoyaumes d'aut' pays.
Viyiz étout: