A M's-Accouaens d'Jêrry

 

Poetry in Jersey

 

N'y-a qu'je n'sai qui,
Qu'dans l'vier Jêrry,
A m's-accouaens j'sounnais de m'n-enclleume;
Mais ch'tait l's-absents;
V'là qu'les persents
Vont aver leus note, aurapreume.

Quànt ès prumiers,
Il 'tait d'méquiers
D'chàntaïr à seul'fin de n'pouit braire;
Et pour les draens,
Tout chu que j'craens
Ch'est qu'par tro chàntaïr je l's-enverre.

Ll'a chunchin d'bouan
Sans raguerouan,
Pour le-s-uns pas pus qu'pour le-s-autres -
Ch'est qu'pour yun mort,
Par piti, l'sort
Nou-s-envie au moins daeux apôtres.

Ch'fut là men cas,
Caêr, quànd, heelas!
L'aut' jour en ânon solitaire,
J'sauti hos d's-iaûx
Cîz les crapauds,
J'trouvi pus d'accouaens qu'je n'paeut pllaire.

Pour yun que j'pllaeus,
J'en guervi daeux,
Et, mànque, j'cré bien, d'pouvier être
A daeux-treis couaens,
Tout en mêm' temps,
Ll'aeut qui me m'nichi d'm-env'yaïr paître.

Su des cardons,
Coum d'aut's-ânons;
Mais coum en Jêrry tout' la terre
N'est qu'patatri,
D'cardons n'y-poui;
Et r'mollissànt, nou n'saeut que m'faire.

Ah! fu-n-on fiers
D'vé mes quat' fers,
Ma coue, et m's-énormes oreilles;
Sàns s'contentaïr
Dem'caressaïr,
D'bontaï s'nou n'mé tui ch'fut méreilles.

Par quatre ou chinq
Tout d'un caoup r'tint,
S'nou n'consummait bère et mâcaille
Autànt coum daeux,
Nou n'tait,d'auv aeuc,
Qu'un original* sàns ventre ou bouaille.

Ll'aeut les Maret,
Perrot, Godfray,
De côte un guiâtre et d'mi qu'j'oubllie;
Les Rossignol,
Mouissons d'haut vol,
D'qui lenterquient jamais n'ennie.

Ah! bah, jamais
J'n'en finirais
D'noummaïr chacun qui m'y canvasshe;
Mais v'là qui f'ra;
Sàns creire en ma',
L'bian grànd nom "d'crapauds" tous l'sembrasshe.

L'Rimeux d'La Fouaret
Guernesy, Avoût 1884



*Nom vulgaire donné à une espèce de boeuf Américain.
 

 

 

Poetry in Jersey

 

 

 

 

La Société Jersiaise

R'tou à la page d'siez-mé | Back to home page