|
Jé sis un vier garçon Et jé mé r'pose dans mes vièrs jours, Ayant vêtchu d'eune triste cârriéthe, Néglyigeant mes jours d'amour. Duthant ma jannèche j'éthais deu m'mathier Pour aver d'la compangnie; J'éthais tréjous 'té accompangni Duthant l'jour et même la niet. Touos les jours dé ma vie J'éthais ieu ma compangnie auve mé, Et en temps d'maladie Tréjous là pour mé souongni. À ch't'heu, j'rêalise ma mêprînse, J'n'ai qué mé-même à bliaûmer; Sus chutte tèrre jé sis seul Et pas d'femme à m'consoler. Ah, ch'est'i' triste dans chutte vie, Tchi faudra mouothi un jour, Ayant janmais rêjoui du pliaîsi Lé grand pliaîsi dé l'amour. Oui, j'n'ai qué mé-même à bliaûmer, Ch'est la véthité puthe, Dé n'aver janmais mathié Ch'est un crînme contre la natuthe. Oh, tchi vie, tchi triste sort Dé n'aver janmais mathié! Jé sis dév'nu ancien et j'appraiche dé la mort, Et pas d'êfants à mé rempliaichi.
Arthur Langlois |
Viyiz étout: