|
Yia eunne ancienne jeune fille qui veint t'chique fais m'vaies, Ou voudret tant avé des habits à ergrais; Et ch'nest pas des robes, cotillons, ni corsets, Mais des qu'minzes, câzaques, des vestes et des braies. Où voudret tchiqu'euns à l'y gardé compagnie, Où n'sé piaiz pas toute seule, car souvent y yiânnyie, Et pis où'l a peueux d'sorti toute seule au sé, Faut qu'où reste siez yi à hôté ou à médité. Où m'a dit d'tâchit d'ly r'quémandé t'chiqu'eun, Où veueux bein qui feumme, mais pas chuchi de p'teun; Je sait bein qu'oùl souonnet comme un p'tit poulet, Et ou'l gardéthait caux quand y f'thait grand fret. Ou'l est bein aimabyie, le t'cheour grand comme eunne maison, Quand ou'l aime les gens, ah! dame il y fait bon Où dit qu'où donnet sa dernièthe boyichie; Estche que t'chique vier garçon n'en étha pas d'envie. J'en connaît eun bein "nice" qui l'y fthait justement, Il a l'nom d'un incrédule; san nom n'est pas Jean. Il est tréjous bein net, et bein frais râzet, Eunne belle petite moustache, et dret comme eun pitchet. Chest eune homme bein affabyie et de si bouanne humeur; Il est rouoge comme eunne rose et n'fait jamais de teurs. Il est tréjous habillyi comme eun gentilhomme, Eunne belle propriétet, et ch'est eun bein bouan homme. J'lai connu toute ma vie, je n'lai jamais veu deueux sortes; Faut que j'vos dize étout qu'il a tréjous d'belles bottes. Chest eun homme d'eunne haoute respectabilitet, N'où l'prendret pour eun Prince, Baron, où t'chique chose. Mais pour ervéné à notre ancienne jenne fille, J'len mennait avec mé au Samedi en Ville, L'y môtrait les boutiques, la statue dans l'vieir marchi; Faut bein la dêshallé, il est grand temps de qu'menchi. J'ai eun vieir ammin qui d'meuthe dans la ville, Il est comme mé, y n'aime pas le nom vieille fille; Il appelle les dames qui n'sont pas mathiées, Des antitchitées qui sont bein prêservées. Des anciennes dames d'évthaient être tréjous respectées, Bein souvent chest lus faoute si n'sont pas mathiées; J'savons pas jamais pâslé d'yieux en suouriant. Les êfants d'vethaient apprendre à les respecté; Dans eunne grande famille, n'ou z'est bein d'les trouvé A ergrais des kauches, à soigni la maison, Quand n'où piante, ou qu'nou fouit, suivant la saison. Comme t'chique fais qu'nou za des p'tites compagnies, Nou z'est bein d'les trouvé pour soigni les p'tits; Un p'tit d'pratique pour yieux est comme eunne leçon, Y n'sont pas si à gauche à garder maison. Enfein y faudra que j'faiche de man mus, A yieintroduithe eun Mousieu, par f'nêtre ou par lus; Sou n'en trouve pas yieun où n'mé donna pas d'erpos, Chest bein seuex qu'où mettra le fardé sus l'dos. Oh! mais j'mens gratte la tête, j'ein sait pas t'chi faithe, Je crait j'ytheait m'promneai Samedi dans la Faithe; Les fermiers, jeunes et vieirs, lus rencontrent là, P'têtre que puoraîmes y vais chu vieir garçon là. Georgie |
Viyiz étout: