Les Pages Jèrriaises

La Vie

Chutt' vie n'est qu'une dur' journaïe
Ou-est qu'nou travaille à raïde-brache:
D'la peine et d'la minsèthe assaiz,
La sueuth coulant le long d'la fache;
Et nou s'fatigue et nou s'tempête
Pour un bieau rein, pour un néant.
Et souvent mêm' nou s'crouaize la tête
Pour ne r'quilli que du tourment.

Nou n'peut se fier sus rein dutout;
Nou n'sait chein qui peut tchai sus l'co:
Aniet ou s'raïs un homm' de sous,
Et d'main ou seraïz peut-êtr' souos l'fou.
Nous bâtis souvent des châtiaux,
Et i' n'en rest' que des décombres;
Comm' le pouor' tchean qui perdit s'n os,
Nous envie l'bouon pour happer l'ombre.

A forch' de travas nou se lasse,
I' faut qu'il y ait un but à tout;
Et la pouor' vie i'faut qu'ou' s'passe,
La mort souvent surprend sus l'coup;
Ch'est le drain fiellaït de tout livre,
Tout dait passé, tout dait fini:
Apprenons donc à sçavé vivre,
Afin de pouvé bein mouothi.

A.A.L.G.

 

Viyiz étout:

 

Les Pages Jèrriaises