Les Pages Jèrriaises

Quiques Véritès

Nouz est p'tit devant qu'être grand,
Fo devant qu'être sage;
Nou vieillit d'un an touos les ans
En avanchant en âge:
Ch'est là de grandes véritès,
Tous l's admettront comme des faits.

Tout chein qui r'lit n'est pas de l'or,
Mêfious de l'apparence;
La santè est un grand trésor
Vivons en esperance:
Quand nou n'est pus utile à rein
Si nou se r'tire nou fait bein.

Si nouz était jeane deux fais
Nou n'serait fo que iune;
Souvent nou se brûle lus daigts
En tentant la fortune:
Bein p'tit sont contents de lus sort
D'vant qu'être attrappés par la mort.

La pllie veint dans un temps muolli,
I' fait fraid quant i' gele;
Le chein qui de tout est tuolli
Passe pour un tout-s'mêle:
I' n'y a qu'un buan homme en Jerri
Et il est dans le vier Marchi.

I' faudrait un autre verset
Pour empliyer la page;
D'un basset ou bein d'un crasset
I' faut donc faire usage:
Je sis à but je n'en peux pus,
I' m'semblle ouir dire Tant mûx.

 

P. L.

 

Viyiz étout:

 

Les Pages Jèrriaises